عوامی خدمات کی فراہمی میں کسی بھی قسم کی کوتاہی ہرگز برداشت نہیں کی جائے گی، ارشد حسین جمالی

جمعرات 14 مئی 2026 19:48

کوئٹہ (اُردو پوائنٹ اخبارتازہ ترین - اے پی پی۔ 14 مئی2026ء) ڈپٹی کمشنر ہرنائی ارشد حسین جمالی کی زیر صدارت ڈپٹی کمشنر کمپلیکس میں دو انتہائی اہم اور اعلیٰ سطحی اجلاس منعقد ہوئے۔ ان اجلاسوں میں ضلع بھر میں صحت اور تعلیم کے شعبوں کی مجموعی کارکردگی، عملے کی حاضری، اور عوام کو درپیش بنیادی مسائل کا تفصیلی جائزہ لیا گیا۔ ڈپٹی کمشنر نے واضح کیا کہ عوامی خدمات کی فراہمی میں کسی بھی قسم کی کوتاہی کو ہرگز برداشت نہیں کیا جائے گا۔

طبی مراکز میں اصلاحات اور ڈسٹرکٹ ہیلتھ کمیٹی کے فیصلے ڈسٹرکٹ ہیلتھ کمیٹی کے اجلاس کے دوران ضلع بھر کے ہسپتالوں اور بنیادی مراکز صحت (BHUs) کی صورتحال پر غور کیا گیا۔ اجلاس میں ڈسٹرکٹ ہیلتھ آفیسر اور دیگر طبی حکام نے شرکت کی۔ڈپٹی کمشنر نے ہدایت کی کہ تمام ہسپتالوں میں ادویات کی مفت اور مسلسل فراہمی کو یقینی بنایا جائے۔

(جاری ہے)

ڈاکٹرز اور پیرا میڈیکل اسٹاف کی بامقصد حاضری کو مانیٹر کیا جائے اور غیر حاضر عملے کے خلاف سخت تادیبی کارروائی عمل میں لائی جائے ، طبی مراکز میں صفائی ستھرائی کے معیار کو بہتر بنا کر مریضوں کو باعزت ماحول فراہم کیا جائے۔

تعلیمی معیار کی بلندی اور ڈسٹرکٹ ایجوکیشن گروپ کی حکمت عملی اسی روز منعقدہ ڈسٹرکٹ ایجوکیشن گروپ کے اجلاس میں محکمہ تعلیم کے افسران نے شرکت کی۔ اجلاس کا محور طلبہ کو بہتر تعلیمی ماحول کی فراہمی اور اساتذہ کی حاضری رہا۔ڈپٹی کمشنر ارشد حسین جمالی نے اس موقع پر زور دیتے ہوئے کہا کہ تعلیمی اداروں میں تدریسی عمل میں تعطل کسی صورت قبول نہیں، سکولوں میں پینے کے صاف پانی اور دیگر بنیادی سہولیات کی فراہمی کے لیے فوری اقدامات اٹھائے جائیں، متعلقہ افسران باقاعدگی سے سکولوں کے فیلڈ وزٹ کریں تاکہ تعلیمی معیار کی حقیقی مانیٹرنگ ممکن ہو سکے۔

اجلاس کے اختتام پر ڈپٹی کمشنر ہرنائی نے تمام محکمہ جاتی سربراہان کو ہدایت کی کہ وہ اپنی ذمہ داریاں ایمانداری اور فرض شناسی سے انجام دیں۔ انہوں نے کہا کہ ضلعی انتظامیہ کا اولین مقصد عوام کے بنیادی مسائل کا ان کی دہلیز پر حل نکالنا ہے۔ عوامی شکایات کے فوری ازالے کے لیے مانیٹرنگ کے عمل کو مزید سخت کرنے اور اداروں کی فعالیت کو مؤثر بنانے کے لیے متعدد اہم فیصلے بھی کیے گئے۔