انمول عرف پنکی کو کراچی سے لاہور منتقل کرنے کی تیاری، 5 مقدمات میں تفتیش شروع ہوگئی

لاہور منتقلی سے شہر میں منشیات کی سپلائی کے بڑے نیٹ ورک اور اسے پناہ دینے والے بااثر افراد کے بے نقاب ہونے کا قوی امکان ہے، تمام دستاویزی ثبوت عدالت پیش کیے جائیں گے؛ پنجاب پولیس حکام

ساجد علی بدھ 20 مئی 2026 11:23

انمول عرف پنکی کو کراچی سے لاہور منتقل کرنے کی تیاری، 5 مقدمات میں تفتیش ..

لاہور ( اُردو پوائنٹ اخبارتازہ ترین۔ 20 مئی2026ء ) منشیات فروش خاتون انمول عرف پنکی کی کراچی میں گرفتاری کے بعد اب پنجاب پولیس نے بھی ملزمہ کے خلاف درج سنگین مقدمات کی باقاعدہ تفتیش کا آغاز کر دیا ہے اور اسے لاہور منتقل کرنے کی تیاریاں مکمل کر لی گئی ہیں۔ میڈیا رپورٹس کے مطابق پنجاب پولیس کے انویسٹی گیشن ونگ نے کوکین ڈیلر انمول عرف پنکی کے خلاف شکنجہ کستے ہوئے ماضی کے تمام مقدمات کی فائلیں کھول دی ہیں، ملزمہ کو کراچی سے لاہور لانے کے لیے دستاویزات کی تیاری کے ساتھ ساتھ محکمہ داخلہ پنجاب سے اس کی باقاعدہ طلبی کی اجازت بھی طلب کر لی گئی ہے۔

انویسٹی گیشن ونگ کا کہنا ہے کہ انمول عرف پنکی گزشتہ 8 برسوں کے دوران لاہور کے مختلف تھانوں میں درج 5 مقدمات میں پولیس کو مطلوب ہے، ان تمام مقدمات میں پنکی باقاعدہ نامزد ملزمہ ہے، تاہم وہ طویل عرصے سے گرفتاری سے بچنے کے لیے روپوش تھی، ڈی آئی جی انویسٹی گیشن سید ذیشان رضا نے اس ہائی پروفائل کیس کے لیے ایس پی سی آر او کو آڈٹ کا ٹاسک سونپا ہے۔

(جاری ہے)

انہوں نے بتایا ہے کہ ملزمہ کے دونوں بھائیوں، ناصر اور ریاض کے خلاف بھی منشیات فروشی کے مقدمات درج ہیں، ملزمہ کے بھائیوں کی حد تک مقدمات کا ٹرائل مکمل ہو چکا ہے اور چالان عدالت میں جمع ہیں، لیکن پنکی کی گرفتاری نہ ہونے کی وجہ سے اس کی حد تک کارروائی رکی ہوئی تھی، ملزمہ کی پنجاب منتقلی کے لیے خصوصی ٹیمیں تشکیل دے دی گئی ہیں جو قانونی اجازت ملتے ہی اسے کراچی سے لاہور لائیں گی۔

پنجاب پولیس نے کہا ہے کہ پنکی کی لاہور منتقلی سے شہر میں منشیات کی سپلائی کے بڑے نیٹ ورک اور اسے پناہ دینے والے بااثر افراد کے بے نقاب ہونے کا قوی امکان ہے، کراچی میں پنکی کے بعد ایک اور منشیات فروش فوزیہ کی گرفتاری اور اس کے انکشافات نے بھی تفتیش کو نیا رخ دے دیا ہے، انمول عرف پنکی کے خلاف تمام دستاویزی ثبوت عدالت میں پیش کیے جائیں گے تاکہ اسے قرار واقعی سزا دلوائی جا سکے۔