اے آئی سے تیار جعلی شواہد نے کورین اداکار کا کیریئر تباہ کر دیا

ٓسیول (اُردو پوائنٹ اخبارتازہ ترین - آن لائن۔ 23 مئی2026ء) جنوبی کوریا میں معروف اداکار کم سو ہیون سے متعلق بڑے اسکینڈل میں پولیس نے انکشاف کیا ہے کہ ایک یوٹیوبر نے مصنوعی ذہانت کے ذریعے جعلی شواہد تیار کر کے اداکار کے خلاف مہم چلائی، جس کے نتیجے میں ان کا کیریئر شدید متاثر ہوا۔ حکام نے یوٹیوبر کی گرفتاری کے لیے وارنٹ جاری کرنے کی درخواست بھی دائر کر دی ہے۔

حکام کے مطابق یوٹیوبر کم سی اٴْئی نے مبینہ طور پر ٹیکسٹ پیغامات کے اسکرین شاٹس میں ردوبدل کیا اور AI سے تیار کردہ آڈیو کلپ شیئر کیا تاکہ یہ تاثر دیا جا سکے کہ کم سو ہیون نے اداکارہ کم سی رون کے ساتھ اس وقت تعلقات قائم کیے تھے جب وہ کم عمر تھیں۔یہ الزامات گزشتہ برس اس وقت سامنے آئے تھے جب کم سی رون نے 24 برس کی عمر میں خودکشی کر لی تھی۔

(جاری ہے)

اس اسکینڈل نے جنوبی کوریا میں شدید ہلچل مچا دی اور کم سو ہیون کے کیریئر کو بری طرح متاثر کیا، جو ملک کے معروف ترین اداکاروں میں شمار ہوتے ہیں۔ اداکار مسلسل ان الزامات کی تردید کرتے رہے ہیں۔دوسری جانب یوٹیوبر کم سی اٴْئی نے ایک ویڈیو جاری کرتے ہوئے حکام کے الزامات کو ’تحقیقات میں رکاوٹ ڈالنے کی سازش‘ قرار دیا ہے۔کم سی رون کی موت کے چند ماہ بعد یوٹیوبر نے ایک آڈیو ریکارڈنگ آن لائن شیئر کی تھی، جس میں اداکارہ کو یہ کہتے ہوئے سنا جا سکتا تھا کہ وہ مڈل اسکول کے زمانے سے کم سو ہیون کے ساتھ تعلق میں تھیں۔

تقریباً 10 لاکھ فالوورز رکھنے والے یوٹیوبر نے ایسے اسکرین شاٹس بھی پیش کیے تھے جنہیں اداکار اور اداکارہ کے درمیان ہونے والی گفتگو قرار دیا گیا تھا۔تاہم اب حکام کا کہنا ہے کہ مذکورہ آڈیو مکمل طور پر AI کے ذریعے تیار کی گئی تھی، جبکہ اداکارہ کے فون سے بھیجے گئے پیغامات کے اسکرین شاٹس میں بھی ردوبدل کیا گیا تاکہ یہ ظاہر کیا جا سکے کہ وہ کم سو ہیون سے رابطے میں تھیں۔

پولیس کے مطابق یوٹیوبر نے مالی فائدہ حاصل کرنے کے لیے جان بوجھ کر جھوٹے الزامات پھیلائے۔جنوبی کورین اخبار جونگ اینگ البو میں شائع پولیس دستاویزات کے مطابق، ’ان اقدامات نے کم سو ہیون کی سماجی ساکھ، معاشی سرگرمیوں اور پیشہ ورانہ زندگی کی بنیاد کو تباہ کر دیا۔‘پولیس کا یہ بھی کہنا ہے کہ کم سو ہیون اب تک نفسیاتی علاج کروا رہے ہیں۔

جنوبی کوریا میں شوبز شخصیات کو انتہائی سخت عوامی نگرانی کا سامنا رہتا ہے اور معمولی تنازعات بھی ان کے کیریئر پر گہرے اثرات مرتب کرتے ہیں۔کم سی رون خود بھی 2022 میں شراب نوشی کے بعد ڈرائیونگ کے ایک مقدمے کے باعث آن لائن نفرت انگیز مہم کا نشانہ بنی تھیں، حالانکہ اس سے قبل انہیں جنوبی کوریا کی ابھرتی ہوئی باصلاحیت اداکاراؤں میں شمار کیا جاتا تھا۔

ان کی موت کے بعد سوشل میڈیا پر افواہیں گردش کرنے لگیں کہ کم سو ہیون نے ان سے اس وقت تعلق قائم کیا تھا جب وہ صرف 15 برس کی تھیں۔ یوٹیوبر کی جانب سے مبینہ آڈیو اور پیغامات جاری کیے جانے کے بعد یہ الزامات مزید شدت اختیار کر گئے، جبکہ اداکارہ کے اہلِ خانہ نے بھی عوامی طور پر ان دعوؤں کی حمایت کی۔ابتدا میں کم سو ہیون کی ایجنسی نے دونوں کے درمیان کسی بھی تعلق کی تردید کی تھی، تاہم بعد میں اداکار نے تسلیم کیا کہ وہ کم سی رون کے ساتھ ایک سال تک تعلق میں رہے، لیکن صرف اس وقت جب وہ بالغ ہو چکی تھیں۔

مارچ 2025 میں ایک جذباتی پریس کانفرنس کے دوران کم سو ہیون نے دوبارہ اس بات پر زور دیا کہ انہوں نے کبھی کم عمری میں اداکارہ سے تعلق نہیں رکھا۔انہوں نے کہا ’میں کسی ایسے عمل کا اعتراف نہیں کر سکتا جو میں نے کیا ہی نہیں۔‘اسی ماہ اداکار نے یوٹیوبر اور اداکارہ کے اہلِ خانہ کے خلاف جھوٹے الزامات لگانے پر فوجداری مقدمات اور ہرجانے کے دعوے بھی دائر کیے تھے۔

اس اسکینڈل کے بعد سے کم سو ہیون، جو ماضی میں کئی کامیاب ڈراموں اور اشتہاری مہمات کا حصہ رہ چکے ہیں، اب تک کسی عوامی تقریب میں نظر نہیں آئے۔اداکار کی زیرِ تکمیل ناک آف، جس پر وہ اسکینڈل سامنے آنے کے وقت کام کر رہے تھے، کی ریلیز بھی غیر معینہ مدت تک مؤخر کر دی گئی ہے۔کم سو ہیون اور ان کی ایجنسی نے تاحال یوٹیوبر کی گرفتاری کے لیے دائر درخواست پر کوئی باضابطہ ردعمل نہیں دیا۔