چیچہ وطنی،پنجاب آرٹس کونسل کے زیر اہتمام ممتاز مصور عبدالمتین کی خدمات کے اعتراف میں تقریب کا انعقاد

بدھ 10 جون 2026 14:19

چیچہ وطنی (اُردو پوائنٹ اخبارتازہ ترین - اے پی پی۔ 10 جون2026ء) پنجاب آرٹس کونسل ساہیوال ڈویژن ساہیوال کے زیر اہتمام ممتاز مصور، خطاط اور نقش نگار عبدالمتین کی طویل فنی خدمات کے اعتراف میں ایک پروقار تقریب کا انعقاد کیا گیا جس میں انہیں "لائف ٹائم اچیومنٹ ایوارڈ" سے نوازا گیا۔ تقریب کے مہمان خصوصی کمانڈنٹ پنجاب پریزن ٹریننگ کالج ساہیوال ملک شوکت فیروز اعوان تھے جبکہ میزبانی کے فرائض ڈائریکٹر آرٹس کونسل ڈاکٹر ریاض ہمدانی نے سرانجام دئیے۔

(جاری ہے)

تقریب میں ساہیوال اور گردونواح سے تعلق رکھنے والے ادب، ثقافت اور فنونِ لطیفہ سے جڑے نامور قلم کاروں، دانشوروں اور فنکاروں کی کثیر تعداد نے شرکت کی۔ تقریب سے خطاب کرتے ہوئے مہمان خصوصی کمانڈنٹ ملک شوکت فیروز اعوان نے عبدالمتین کی خدمات کو خراج تحسین پیش کرتے ہوئے کہا کہ عبدالمتین جیسے تخلیق کار معاشرے کا حقیقی سرمایہ اور اثاثہ ہیں۔ ان کی پینٹنگز اور خطاطی کے نمونے ہماری ثقافتی شناخت کی عکاسی کرتے ہیں۔ بالخصوص ہڑپہ کی قدیم تہذیب کے حوالے سے جس مہارت سے انہوں نے ہڑپائی تہذیب کو زندہ کیا ہے وہ ان کے گہرے تاریخی شعور اور بے مثال ہنر کا منہ بولتا ثبوت ہے۔