چیچہ وطنی ، انٹرن شپ پروگرام فیز ٹو کے 10 ویٹرنری گریجویٹس اور4 پیرا ویٹس کے منتخب امیدواروں میں تقرری کے آرڈرز تقسیم

جمعرات 11 جون 2026 14:24

چیچہ وطنی (اُردو پوائنٹ اخبارتازہ ترین - اے پی پی۔ 11 جون2026ء) ایڈیشنل ڈائریکٹر لائیو سٹاک محمد علی اسلم نے وزیر اعلی ٰانٹرن شپ پروگرام فیز ٹو کے 10ویٹرنری گریجویٹس اور4 پیرا ویٹس کے منتخب امیدواروں میں تقرری و تعیناتی کے آرڈرز تقسیم کیے۔ڈپٹی ڈائریکٹر لائیوسٹاک عرفان مشتاق بھی اس موقع پر موجود تھے۔ایڈیشنل ڈائریکٹر لائیو سٹاک محمد علی اسلم نے کہا کہ وزیراعلیٰ پنجاب کی جانب سے شروع کیا گیا یہ انٹرن شپ پروگرام نوجوان ویٹرنری گریجویٹس اور پیرا ویٹس کو عملی میدان میں تجربہ فراہم کرنے کے ساتھ ساتھ لائیو سٹاک سیکٹر کی ترقی میں اہم کردار ادا کرے گا۔

انہوں نے کہا کہ پروگرام کے تحت نوجوانوں کو جدید ویٹرنری سروسز، جانوروں کی صحت، بیماریوں کی روک تھام اور کسانوں کی رہنمائی کے حوالے سے عملی تربیت حاصل ہوگی۔

(جاری ہے)

انہوں نے منتخب انٹرنز کو مبارکباد دیتے ہوئے کہا کہ وہ اپنی ذمہ داریاں دیانتداری، محنت اور پیشہ ورانہ صلاحیتوں کے ساتھ انجام دیں تاکہ پنجاب کے لائیو سٹاک شعبے کی مزید بہتری اور کسانوں کی خوشحالی کے حکومتی ویژن کو عملی جامہ پہنایا جا سکے۔ تقریب میں محکمہ لائیو سٹاک کے افسران، ویٹرنری ڈاکٹرز، پیرا ویٹس اور انٹرن شپ پروگرام کے منتخب امیدواروں نے شرکت کی۔ شرکا ءنے وزیراعلیٰ پنجاب کی نوجوانوں کے لیے روزگار اور پیشہ ورانہ تربیت کے مواقع فراہم کرنے کی کاوشوں کو سراہا۔