کوئٹہ: جے یو آئی (ف) کے رہنماؤں کا طویل اور غیر اعلانیہ لوڈشیڈنگ کی شدید مذمت، شہریوں اور تاجروں کے لیے اذیت ناک قرار

۷کیسکو حکام کی نااہلی اور ناقص منصوبہ بندی کے باعث شہر مسائل کا گڑھ بن گیا، بلاتعطل بجلی کی فراہمی کا مطالبہ

جمعرات 11 جون 2026 20:15

کوئٹہ (اُردو پوائنٹ اخبارتازہ ترین - آن لائن۔ 11 جون2026ء) جمعیت علماء اسلام ضلع کوئٹہ کے امیر شیخ الحدیث مولانا عبدالرحمن رفیق، سیکرٹری جنرل حاجی عین اللہ شمس، سینئر نائب امیر مولانا خورشید احمد، حاجی بشیر احمد کاکڑ، سیکرٹری اطلاعات عبدالغنی شہزاد، عبدالصمد حقیار، مفتی محمد ابوبکر، ڈیجیٹل میڈیا کوارڈنیٹر عبدالباری شہزاد، مولانا جمال الدین حقانی، مفتی رشید احمد حقانی اور حاجی عطاء محمد شمشوزئی نے کہا ہے کہ صوبائی دارالحکومت کوئٹہ کے بیشتر علاقوں میں جاری غیر اعلانیہ اور طویل بجلی لوڈشیڈنگ عوام کے لیے شدید اذیت اور پریشانی کا باعث بن چکی ہے۔

شدید گرمی کے موسم میں بجلی کی بار بار بندش نے شہریوں کی روزمرہ زندگی کو مفلوج کر دیا ہے انہوں نے کہا کہ کیسکو حکام کی نااہلی غفلت اور ناقص منصوبہ بندی کے باعث شہری مسلسل مشکلات سے دوچار ہیں۔

(جاری ہے)

بجلی کی غیر یقینی فراہمی نہ صرف گھریلو صارفین بلکہ کاروباری طبقے کو بھی بری طرح متاثر کر رہی ہے۔خصوصاً کولڈ ڈرنکس، دودھ، دہی اور دیگر اشیائے خورونوش سے وابستہ دکانداروں کو مالی نقصانات کا سامنا ہے جس کے منفی اثرات ان کی کاروباری سرگرمیوں پر نمایاں طور پر مرتب ہو رہے ہیں۔

انہوں نے کہا کہ بدترین انتظامی صورتحال کے باعث کوئٹہ کے شہری بنیادی سہولیات سے محروم ہیں۔ ایسا محسوس ہوتا ہے کہ شہر کو عملاً مسائل کا گڑھ بناکر چھوڑ دیا گیا ہے۔ افسوسناک امر یہ ہے کہ عوامی مشکلات کے حل اور شہری مسائل کے ازالے کے حوالے سے حکومت اور متعلقہ انتظامیہ سنجیدگی کا مظاہرہ نہیں کر رہی۔انہوں نے مطالبہ کیا کہ حکومت اور کیسکو حکام فوری طور پر غیر اعلانیہ لوڈشیڈنگ کا خاتمہ اور بجلی کی بلاتعطل فراہمی کے لیے ہنگامی بنیادوں پر اقدامات کریں