زرعی یونیورسٹی سوات نے چار سال میں بڑا اعزاز حاصل کر لیا، صوبائی درجہ بندی میں نمایاں پوزیشنیں اپنے نام کر لیں

جمعہ 19 جون 2026 22:56

سوات (اُردو پوائنٹ اخبارتازہ ترین - این این آئی۔ 19 جون2026ء) زرعی یونیورسٹی سوات نے اپنے قیام کے محض چار سال کے مختصر عرصے میں ایک اہم سنگِ میل عبور کرتے ہوئے خیبر پختونخوا میں پہلی مرتبہ منعقد ہونے والی صوبائی جامعات کی درجہ بندی میں نمایاں کامیابی حاصل کر لی ہے۔ یونیورسٹی نے مجموعی جامعات میں 23ویں جبکہ ٹیکنیکل جامعات اور ابھرتی ہوئی جامعات کی کیٹیگریز میں 5ویں پوزیشن حاصل کرکے تعلیمی حلقوں میں اپنی صلاحیتوں کا لوہا منوا لیا ہے۔

یونیورسٹی کی اس شاندار کامیابی کو تعلیمی، تحقیقی اور انتظامی میدان میں مسلسل ترقی اور معیار کی بہتری کا مظہر قرار دیا جا رہا ہے۔ ماہرین تعلیم کے مطابق کسی بھی نو قائم شدہ جامعہ کے لیے اتنے کم عرصے میں صوبائی سطح پر نمایاں مقام حاصل کرنا ایک غیر معمولی کامیابی ہے۔

(جاری ہے)

زرعی یونیورسٹی سوات کی اس کامیابی کا سہرا وائس چانسلر پروفیسر ڈاکٹر داد جان کی مثر قیادت، وژن اور انتھک محنت کو دیا جا رہا ہے، جبکہ اساتذہ، انتظامی عملے، طلبہ اور دیگر متعلقہ افراد کی اجتماعی کاوشوں اور پیشہ ورانہ صلاحیتوں نے بھی اس کامیابی میں اہم کردار ادا کیا ہے۔

یونیورسٹی انتظامیہ کے مطابق ادارہ تعلیم، تحقیق، جدت اور سماجی خدمت کے فروغ کے لیے بھرپور انداز میں کوشاں ہے جبکہ زرعی شعبے میں جدید تحقیق اور عملی مہارتوں کے فروغ کے لیے بھی مثر اقدامات کیے جا رہے ہیں۔ تعلیمی حلقوں نے اس نمایاں کامیابی پر وائس چانسلر، اساتذہ، طلبہ اور انتظامیہ کو مبارکباد پیش کرتے ہوئے امید ظاہر کی ہے کہ زرعی یونیورسٹی سوات مستقبل میں بھی علمی، تحقیقی اور فنی میدان میں نئی کامیابیاں سمیٹے گی اور خطے کی ترقی میں اپنا موثر کردار ادا کرتی رہے گی۔

Facebook Twitter Google + Share on Whatsapp

زرعی یونیورسٹی سوات نے چار سال میں بڑا اعزاز حاصل کر لیا، صوبائی درجہ بندی میں نمایاں پوزیشنیں اپنے نام کر لیں

متعلقہ عنوان :

مزید تعلیم کی خبریں