علامہ اقبال اوپن یونیورسٹی کے خزاں 2026 کے داخلوں میں 24 اگست تک توسیع

بدھ 12 اگست 2026 17:26

ملتان (اُردو پوائنٹ اخبارتازہ ترین - اے پی پی۔ 12 اگست2026ء) علامہ اقبال اوپن یونیورسٹی نے سمسٹر خزاں 2026 کے داخلوں کی آخری تاریخ میں توسیع کرتے ہوئے طلبہ و طالبات کو 24 اگست 2026 تک داخلہ لینے کا موقع فراہم کردیا ہے۔ ریجنل ڈائریکٹر ملتان غلام حسین کھوسہ کے مطابق مختلف تعلیمی پروگرامز میں داخلے جاری ہیں۔ انہوں نے بتایا کہ خزاں 2026 میں میٹرک سائنس، جنرل، درس نظامی اور دینی مدارس طلبہ کے لیے اوپن کورسز، چھ ماہ کے سرٹیفکیٹ و ڈپلومہ، ایف ایس سی پری میڈیکل و پری انجینئرنگ، آئی کام، ایف اے جنرل و درس نظامی، ایسوسی ایٹ ڈگری ان آرٹس، ایسوسی ایٹ ڈگری ان کامرس، بی ایڈ، بی ایس، بی بی اے اور پوسٹ گریجویٹ ڈپلومہ سمیت متعدد پروگرامز میں داخلے جاری ہیں۔

غلام حسین کھوسہ نے کہا کہ میٹرک، ایف اے، آئی کام، ایف ایس سی، ایسوسی ایٹ ڈگری اور بی ایڈ پروگرامز میں طلبہ و طالبات آن لائن یا داخلہ فارم کے ذریعے اپلائی کرسکتے ہیں جبکہ دیگر پروگرامز میں آن لائن درخواست دینا ہوگی۔

(جاری ہے)

طلبہ کی سہولت کے لیے ریجنل کیمپس شاہ رکن عالم کالونی ملتان میں فرنٹ ڈیسک بھی قائم کیا گیا ہے جہاں مفت آن لائن داخلہ اپلائی کروانے کی سہولت دستیاب ہے۔ انہوں نے بتایا کہ داخلہ فیس الائیڈ بینک، مسلم کمرشل بینک، فرسٹ ویمن بینک اور نیشنل بینک آف پاکستان کی کسی بھی برانچ کے علاوہ جاز کیش، ایزی پیسہ اور یو پیسہ کے ذریعے بھی جمع کرائی جاسکتی ہے۔ پراسپیکٹس یونیورسٹی کی ویب سائٹ سے ڈاؤن لوڈ کیے جاسکتے ہیں ۔