علامہ اقبال اوپن یونیورسٹی ریجنل سیالکوٹ میں یومِ آزادی کے حوالے سے پروقار تقریب کا انعقاد

جمعرات 13 اگست 2026 22:54

سیالکوٹ (اُردو پوائنٹ اخبارتازہ ترین - اے پی پی۔ 13 اگست2026ء) علامہ اقبال اوپن یونیورسٹی ریجنل کیمپس سیالکوٹ میں یومِ آزادی کے حوالے سے سادہ، باوقار اور پروقار تقریب کا انعقاد کیا گیا جس میں ریجنل آفس کے اسٹاف، ٹیوٹرز، علامہ اقبال اوپن یونیورسٹی کے طلبہ و طالبات اور دیگر طلبہ نے بھرپور شرکت کی۔ تقریب کا آغاز تلاوتِ کلامِ پاک سے ہوا جس کے بعد نعتِ رسولِ مقبول ﷺ پیش کی گئی۔

تقریب کے دوران تقریری مقابلوں اور ملی نغموں کا بھی اہتمام کیا گیا، جن میں طلبہ و طالبات نے جوش و خروش سے حصہ لیتے ہوئے اپنی صلاحیتوں کا شاندار مظاہرہ کیا۔ اس موقع پر شرکا نے وطنِ عزیز کی آزادی کی اہمیت، قیامِ پاکستان کے مقاصد اور ملکی ترقی و خوشحالی کے لیے اپنا کردار ادا کرنے کے عزم کا اظہار کیا۔

(جاری ہے)

تقریب کے اختتام پر ریجنل ڈائریکٹر چوہدری حسن صفتیں چیمہ نے تمام ٹیوٹرز، طلبہ و طالبات اور دیگر شرکا کا تہہ دل سے شکریہ ادا کیا اور کہا کہ یومِ آزادی ہمیں اپنے بزرگوں کی لازوال قربانیوں کی یاد دلاتا ہے ،ہمیں چاہیے کہ پاکستان کی ترقی، استحکام اور خوشحالی کے لیے متحد ہو کر اپنا کردار ادا کریں۔

انہوں نے خصوصی طور پر عاشق حسین صدیقی کا بھی شکریہ ادا کیا جنہوں نے تقریب کے اسٹیج سیکریٹری کے فرائض انتہائی خوبصورتی اور احسن انداز میں انجام دیئے۔ تقریب کے اختتام پر ملکی سلامتی، امن، ترقی اور خوشحالی کے لیے خصوصی دعا کی گئی۔ شرکا نے پاکستان زندہ باد کے نعروں کے ساتھ وطن سے اپنی محبت کا اظہار کیا۔