ڈپٹی کمشنر سارہ حیات کا ڈسٹرکٹ ہیڈ کوارٹرز ہسپتال چکوال کا دورہ ،کسی بھی ہنگامی صورتحال سے نمٹنے کیلئے کیے گئے انتظامات کا جائزہ لیا

اتوار 21 جون 2026 19:05

چکوال(اُردو پوائنٹ اخبارتازہ ترین - این این آئی۔ 21 جون2026ء) ڈپٹی کمشنر سارہ حیات نے ڈسٹرکٹ ہیڈ کوارٹرز ہسپتال چکوال کا دورہ کیا اور محرم الحرام کے دوران کسی بھی ہنگامی صورتحال سے نمٹنے کیلئے کیے گئے انتظامات کا تفصیلی جائزہ لیا اس موقع پر میڈیکل سپرنٹنڈنٹ ڈاکٹر مختار سرور خان نیازی نے ہسپتال میں قائم ایمرجنسی پلان، ادویات کی دستیابی، طبی عملے کی ڈیوٹی روسٹر، ایمبولینس سروسز اور دیگر ضروری انتظامات کے حوالے سے بریفنگ دی۔

ڈپٹی کمشنر نے ایمرجنسی وارڈ، ادویات کے ذخائر اور دیگر متعلقہ شعبہ جات کا معائنہ کرتے ہوئے مریضوں کو فراہم کی جانے والی طبی سہولیات کا جائزہ لیا۔ ڈپٹی کمشنر نے ہدایت کی کہ محرم الحرام کے دوران تمام طبی و پیرامیڈیکل عملہ الرٹ رہے اور کسی بھی ناخوشگوار واقعے یا ہنگامی صورتحال سے نمٹنے کے لیے ہمہ وقت تیار رہے۔

(جاری ہے)

انہوں نے کہا کہ ضلعی انتظامیہ محرم الحرام کے دوران شہریوں کو بہترین طبی سہولیات کی فراہمی یقینی بنانے کے لیے تمام دستیاب وسائل بروئے کار لا رہی ہے۔

انہوں نے اس بات پر زور دیا کہ ہسپتال میں ادویات، طبی آلات اور خون کی دستیابی کو یقینی بنایا جائے تاکہ کسی بھی ایمرجنسی کی صورت میں فوری اور مؤثر طبی امداد فراہم کی جا سکے۔ میڈیکل سپرنٹنڈنٹ ڈاکٹر مختار سرور خان نیازی نے ڈپٹی کمشنر کو یقین دلایا کہ محرم الحرام کے دوران ہسپتال میں ایمرجنسی رسپانس سسٹم کو مزید فعال بنایا گیا ہے اور تمام انتظامات مکمل کر لیے گئے ہیں تاکہ عوام کو بروقت اور معیاری طبی سہولیات فراہم کی جا سکیں