چیچہ وطنی ، بنگلہ دیش کے ہائی کمشنر کا زرعی اور لائیو سٹاک شعبے کا جائزہ لینے کے لیے ساہیوال کا دورہ

منگل 7 جولائی 2026 16:53

چیچہ وطنی (اُردو پوائنٹ اخبارتازہ ترین - اے پی پی۔ 07 جولائی2026ء) اسلام آباد میں عوامی جمہوریہ بنگلہ دیش کے ہائی کمشنراقبال حسین خان نے ضلع ساہیوال کا دو روزہ سرکاری دورہ کیا تاکہ ضلع کی زرعی اور لائیو سٹاک ترقی کا جائزہ لیا جا سکے۔ یہ دورہ ساہیوال چیمبر آف کامرس اینڈ انڈسٹری اور محکمہ زراعت ساہیوال کے باہمی اشتراک سے زراعت، لائیو سٹاک، تجارت اور سرمایہ کاری کے شعبوں میں پاکستان اور بنگلہ دیش کے درمیان باہمی تعاون کو فروغ دینے کے مقصد سے ترتیب دیا گیا۔

ڈپٹی ہائی کمشنر فضل لوہانی، کونسلر (پریس)طیب علی، اور کونسلر(پولیٹیکل)بھی ان کے ہمراہ تھیں۔ وفد نے پیر احسان الحق ادریس مینگو آرچرڈ کا دورہ کیا، جہاں ہائی کمشنر نے مختلف تجارتی اقسام کے آموں کا مشاہدہ کیا۔

(جاری ہے)

بعد ازاں وفد نے بنیامین مینگو آرچرڈ کا بھی دورہ کیا، جہاں جدید باغی انتظام، آم کی پیداوار اور بہترین زرعی طریقہ کار کا مشاہدہ کیا اور ضلع ساہیوال میں آم کی اعلی معیار کی پیداوار کو سراہا۔

وفد نے موضع 77/6 آر میں واقع ایک جدید ڈیری فارم کا دورہ کیا۔ ہائی کمشنر نے مکینیکل ملکنگ سسٹم، دودھ کی پیداوار، ریوڑ کے انتظام اور جانوروں کے لیکٹیشن پیریڈ میں خصوصی دلچسپی کا اظہار کیا اور جدید ڈیری فارمنگ ٹیکنالوجی کو سراہا۔ انہوں نے الہیوان سیمن پروڈکشن سنٹر، پاکپتن روڈ، ساہیوال کا دورہ کیا، جہاں انہیں سیمن پروڈکشن ٹیکنالوجی، جینیاتی بہتری کے پروگرامز اور عالمی شہرت یافتہ ساہیوال نسل کی گائے کے بارے میں بریفنگ دی گئی۔

ہائی کمشنر نے بنگلہ دیش میں ڈیری سیکٹر اور لائیو سٹاک کی جینیاتی بہتری کے لیے ساہیوال نسل کے سیمن کی درآمد میں خصوصی دلچسپی کا اظہار کیا۔ دورے کے دوران وفد کو ضلع ساہیوال کی تاریخی اہمیت، پاکستان کی زرعی معیشت میں اس کے نمایاں کردار، نہری نظام، اہم فصلات اور جدید زرعی ٹیکنالوجی کے فروغ میں محکمہ زراعت(توسیع)کی خدمات کے بارے میں بھی تفصیلی بریفنگ دی گئی۔

وفد نے ضلع ساہیوال کے عوام اور متعلقہ اداروں کی جانب سے پرتپاک میزبانی پر شکریہ ادا کیا اور زراعت، ڈیری فارمنگ اور لائیو سٹاک کے شعبوں میں ضلع کی نمایاں کامیابیوں کو سراہا۔ انہوں نے اس امید کا اظہار کیا کہ یہ دورہ پاکستان اور بنگلہ دیش کے درمیان زراعت، لائیو سٹاک، تجارت، ٹیکنالوجی کی منتقلی اور باہمی تعاون کو مزید مضبوط بنانے میں اہم کردار ادا کرے گا۔