منت مُرادوں اور دعاؤں کے بعد بیٹا ملا، ظالم پڑوسی نے مبینہ طور پر زیادتی کے بعد قتل کردیا

ملزم نے لاش بوری میں بند کرکے 3 منزلہ عمارت سے نیچے پھینک دی، 6 سالہ بچہ محمد ولی چیز لینے کیلئے گیا اور لاپتا ہوگیا، ملزم گرفتار، پولیس نے تفتیش شروع کردی

ثنااللہ ناگرہ جمعرات 9 جولائی 2026 00:52

منت مُرادوں اور دعاؤں کے بعد بیٹا ملا، ظالم پڑوسی نے مبینہ طور پر زیادتی ..

کراچی (اُردو پوائنٹ اخبارتازہ ترین۔ 08 جولائی 2026ء) کراچی میں والدین کو منت مرادوں اور دعاؤں کے بعد بیٹا ملا، ظالم پڑوسی نے مبینہ طور پر زیادتی کے بعد قتل کیا اور لاش بوری میں بند کرکے 3 منزلہ عمارت سے نیچے پھینک دی، 6 سالہ بچہ محمد ولی چیز لینے کیلئے گیا اور لاپتا ہوگیا، پولیس نے ملزم کو گرفتار کرکے تفتیش شروع کر دی ہے۔ میڈیا کے مطابق کراچی کے علاقے لی مارکیٹ میں 6 سالہ بچے محمد ولی کو اغوا کے بعد قتل کر دیا گیا، مقتول کی بوری بند لاش ملی۔

ولی کے قاتل ملزم حمزہ کو اہل علاقہ نے پکڑ کر پولیس کے حوالے کر دیا۔ پولیس کے مطابق کم سن محمد ولی کو پیر کی شام گھر کے باہر سے اغوا کیا گیا تھا، ملزم نے بچے کی مسخ شدہ لاش بوری میں بند کر کے اہل خانہ کے مطابق 3 منزلہ عمارت سے نیچے پھینک دی تھی۔

(جاری ہے)

لی مارکیٹ پنجابی محلے سے پیر کی شام چھ سالہ بچہ محمد ولی چیز لینے نکلا اور لاپتا ہوگیا، اہل خانہ کی جانب سے واقعے کا مقدمہ بھی درج کروایا گیا، منگل اور بدھ کی درمیانی شب بچے کی بوری بند لاش گھر کے قریب سے ملی۔

والدہ نے الزام عائد کیا کہ بچے کی مسخ شدہ لاش بوری میں بند کر کے تین منزلہ عمارت سے نیچے پھینکی گئی۔ ڈی آئی جی ساؤتھ اسد رضا کے مطابق گرفتار ملزم بچے کا پڑوسی ہے، ابتدائی تحقیقات میں انکشاف ہوا ہے کہ ملزم نے بچے کے ساتھ زیادتی کے بعد اسے قتل کیا۔ پولیس نے ملزم کو گرفتار کر کے مزید تفتیش شروع کر دی ہے۔ چھ سالہ محمد ولی 5 بہن بھائیوں میں سب سے چھوٹا تھا۔

وزیراعلیٰ سندھ کو پولیس کی ابتدائی رپورٹ پیش کر دی گئی، جس میں ملزم کی گرفتاری اور تفتیش کی پیش رفت سے آگاہ کیا گیا۔ پولیس کے مطابق محمد ولی دو روز قبل اپنے گھر کے باہر سے لاپتا ہوگیا تھا۔ والد عابد حسین کی مدعیت میں نیپئر تھانے میں اغوا کا مقدمہ درج ہونے کے بعد پولیس، اہل خانہ اور علاقہ مکین مسلسل بچے کی تلاش میں مصروف رہے۔ تلاش کے دوران محلے کے قریب واقع خالی پلاٹ میں ایک بوری ملی، جو بظاہر تین منزلہ عمارت سے نیچے پھینکی گئی تھی۔

بوری کھولنے پر اس میں معصوم بچے کی مسخ شدہ لاش برآمد ہوئی، جس کے بعد علاقے میں کہرام مچ گیا۔ لاش کو ضابطے کی کارروائی اور پوسٹ مارٹم کے لیے سول اسپتال منتقل کر دیا گیا۔ڈی آئی جی ساؤتھ اسد رضا کے مطابق ابتدائی تحقیقات سے معلوم ہوا ہے کہ بچے کے ساتھ مبینہ زیادتی کے بعد اسے قتل کیا گیا۔ پولیس نے مقتول کے پڑوسی حمزہ کو گرفتار کرکے مقدمہ نمبر 92/26 میں نامزد کر دیا ہے۔ ایڈیشنل آئی جی کراچی آزاد خان کے مطابق ملزم کی گرفتاری پولیس ٹیم نے مؤثر کارروائی کرتے ہوئے عمل میں لائی اور وہ خود اس حساس مقدمے کی تفتیش کی نگرانی کریں گے، جبکہ واقعے کے تمام پہلوؤں سے تحقیقات جاری ہیں۔