جنوبی افریقا اور پاکستان کے درمیان پانچ میچز پر مشتمل سیریز (کل) سے 24 جولائی تک نیشنل بینک اسٹیڈیم میں کھیلی جائے گی

پیر 13 جولائی 2026 17:53

کراچی (اُردو پوائنٹ اخبارتازہ ترین - این این آئی۔ 13 جولائی2026ء) جنوبی افریقا اور پاکستان کے درمیان پانچ میچز پر مشتمل سیریز (کل) منگل14 سے 24 جولائی تک نیشنل بینک اسٹیڈیم میں کھیلی جائے گی۔سیریز میں پاکستان انڈر 19 ٹیم کی قیادت فضا فیاض کریں گی جبکہ مہمان ٹیم کی کپتان نیکی وین سورس ہیں۔ دونوں ٹیمیں 11 سے 13 جولائی تک شبینہ تربیتی مشقوں میں حصہ لیں گی۔

سیریز کے آغاز سے قبل 13 جولائی کو ٹرافی کی رونمائی کی تقریب منعقد ہوگی اور دونوں کپتان میڈیا سے گفتگو کریں گے۔

(جاری ہے)

سیریز کاپہلا نائٹ ٹی ٹوئنٹی میچ 14، دوسرا 17، تیسرا 19، چوتھا 22 اور پانچواں اور آخری میچ 24 جولائی کو طے ہے۔سیریز کا مقصد آئندہ اے سی سی ویمنز انڈر 19 ٹی ٹوئنٹی ایشیا کپ اور آئی سی سی ویمنز انڈر 19 ٹی ٹوئنٹی ورلڈ کپ کی تیاری ہے۔

پاکستان ویمنز انڈر 19 اسکواڈ کپتان فضا فیاض، الزوہہ حماد، اقصیٰ حبیب، عریشہ انصاری، بریرہ سیف، ہادیہ مینا، کومل خان، ماہ نور، ماہم نزاکت، ماہنور زیب، میمونہ خالد، راحمہ سید، روائل فرحان، روزینہ اکرم، شہر بانو، زینب خانم اور ذوفشاں ایاز پر مشتمل ہے،محمد مسرور ہیڈ کوچ، عائشہ اشعر ٹیم مینجر اورسابق ویمن انٹرنیشنل کھلاڑی جویریہ روف فیلڈنگ کوچ کی ذمہ داری ادا کر رہی ہیں۔