Live Updates

سول اسپتال جیکب آباد میں ایک ماہ میں 61 لاکھ سے زائد خرچ، کروڑوں کے بجٹ پر شفافیت کے سوالات

(جون میں 52 لاکھ 85 ہزار کی ادویات، گاڑی کی مرمت پر ساڑھے 3 لاکھ، ایک ملازم کو 2 لاکھ مالی امداد، سال بھر میں ادویات پر 2 کروڑ 27 لاکھ سے زائد خرچ، ذرائع

بدھ 15 جولائی 2026 23:13

جیکب آباد (اُردو پوائنٹ اخبارتازہ ترین - آن لائن۔ 15 جولائی2026ء) سول اسپتال جیکب آباد میں ایک ماہ میں 61 لاکھ سے زائد خرچ، کروڑوں کے بجٹ پر شفافیت کے سوالات،جون میں 52 لاکھ 85 ہزار کی ادویات، گاڑی کی مرمت پر ساڑھے 3 لاکھ، ایک ملازم کو 2 لاکھ مالی امداد، سال بھر میں ادویات پر 2 کروڑ 27 لاکھ سے زائد خرچ، ذرائع تفصیلات کے مطابق جیکب آباد کے سول اسپتال میں مالی بے ضابطگیوں اور سرکاری فنڈز کے استعمال پر نئے سوالات اٹھ کھڑے ہوئے ہیں۔

ذرائع کے مطابق اسپتال نے صرف جون 2026 کے دوران 61 لاکھ 18 ہزار روپے سے زائد کے اخراجات کیے، جن میں ادویات، گاڑی کی مرمت اور دیگر مدات شامل ہیں۔ذرائع کے مطابق جون کے مہینے میں 52 لاکھ 85 ہزار روپے سے زائد مالیت کی ادویات خریدی گئیں، جبکہ ایک سرکاری گاڑی کی مرمت پر 3 لاکھ 51 ہزار روپے خرچ کیے گئے۔

(جاری ہے)

اسی عرصے میں ایک ملازم کو 2 لاکھ روپے کی مالی معاونت بھی فراہم کی گئی۔

دستاویزی معلومات کے مطابق سول اسپتال کے جنریٹر کے ایندھن پر سالانہ تقریباً 20 لاکھ روپے خرچ کیے جا رہے ہیں، جبکہ ادویات کی خریداری پر ایک سال کے دوران 2 کروڑ 27 لاکھ 41 ہزار روپے سے زائد خرچ کیے گئے۔ان بھاری اخراجات کے باوجود شہریوں کا کہنا ہے کہ اسپتال میں اکثر ضروری ادویات کی قلت، طبی سہولیات کی کمی، مریضوں کو بازار سے دوائیں خریدنے کی شکایات اور بنیادی سہولتوں کے فقدان کی آوازیں مسلسل سامنے آتی رہی ہیں، جس سے سرکاری اخراجات اور زمینی حقائق کے درمیان فرق پر سوالات جنم لے رہے ہیں۔

شہریوں اور سماجی حلقوں نے مطالبہ کیا ہے کہ جون کے تمام اخراجات کا آزادانہ مالیاتی آڈٹ کرایا جائے۔ادویات کی خریداری، تقسیم اور استعمال کا مکمل ریکارڈ عوام کے سامنے لایا جائے۔گاڑی کی مرمت پر خرچ ہونے والی رقم کی تکنیکی جانچ کرائی جائے۔مالی معاونت سمیت تمام ادائیگیوں کی قانونی حیثیت اور قواعد کے مطابق ہونے کی تصدیق کی جائے۔انہوں نے وزیراعلیٰ سندھ، وزیر صحت، سیکریٹری صحت، ڈائریکٹر جنرل ہیلتھ اور اینٹی کرپشن سمیت متعلقہ اداروں سے مطالبہ کیا کہ اگر کسی قسم کی مالی بے ضابطگی یا قواعد کی خلاف ورزی سامنے آئے تو ذمہ داروں کے خلاف سخت قانونی کارروائی کی جائے۔