Live Updates

رواں ماہ مشرقِ وسطیٰ میں امریکی فوجی اڈوں پر ایرا نی فضائی حملوں میں 100 امریکی فوجی زخمی ہوئے ، پینٹا گون

منگل 21 جولائی 2026 11:08

واشنگٹن (اُردو پوائنٹ اخبارتازہ ترین - اے پی پی۔ 21 جولائی2026ء) امریکی وزارتِ دفاع نے اس بات کی تصدیق کی ہے کہ رواں ماہ مشرقِ وسطیٰ میں امریکی فوجی اڈوں پر ایران کے متعدد فضائی حملوں میں تقریباً 100 امریکی فوجی اہلکار زخمی ہوئے ہیں۔امریکی وزارت دفاع کے مرکز پینٹاگون کے مرکزی ترجمان سین پارنیل نے بتایا کہ 7 جولائی 2026 کے بعد سے تقریباً 100 امریکی فوجیوں کو کسی نہ کسی درجے کی چوٹ لگی ہے، جن میں سے 96 فیصد جو معمولی زخمی ہوئے تھے ، دوبارہ اپنی ڈیوٹی پر واپس آ چکے ہیں۔

گزشتہ ہفتے کے اختتام پر امریکی محکمہ دفاع نے اعلان کیا تھا کہ اردن میں ایک فوجی اڈے پر 2 امریکی فوجی ہلاک ہو گئے جبکہ جس مقام سے تیسرا امریکی فوجی لا پتہ ہوا تھا، وہاں سے نامعلوم باقیات ملی ہیں۔

(جاری ہے)

ایک اور امریکی فوجی عراق میں ایرانی خود کش ڈرون کے گرنے کے بعد اس میں موجود دھماکہ خیز مواد کو کنٹرولڈ طریقے سے تباہ کرنے کے دوران ہلاک ہو گیا۔

پینٹاگون نے ایرانی حملوں کی تازہ لہر میں زخمی ہونے والے فوجیوں کی درست تعداد یا نقصانات کی تفصیلات عوامی طور پر جاری نہیں کی ہیں۔فوج کے ہلاک اور زخمی اہلکاروں کا ریکارڈ رکھنے والے ڈیفنس کیژولٹی اینالیسس سسٹم (ڈی سی اے ایس) کے مطابق امریکا اور ایران کے درمیان تنازع کے آغاز سے اب تک 413 امریکی فوجی اہلکار کارروائی کے دوران زخمی ہوئے ہیں، تاہم اس تعداد میں رواں ماہ زخمی ہونے والے فوجی اہلکار شامل نہیں ہیں۔ڈی سی اے ایس کی ویب سائٹ پر ایک اور جگہ زخمیوں کی تعداد 427 درج ہے۔ گزشتہ ہفتے کے آخر میں ہونے والی ہلاکتوں کو شامل کیے بغیر 14 امریکی ہلاک ہو چکے ہیں اور اردن میں ہلاک ہونے والی تین فوجی اہلکاروں کو شامل کر نے کے بعد یہ تعداد 17 ہو گئی ہے۔