Live Updates

تہران میں تعینات دو فرانسیسی سفارتکاروں کا طرزِ عمل ناقابل قبول ہے. عباس عراقچی

سفارتی ضابطوں سے متصادم اقدامات کی روک تھام کی جائے. ایرانی وزیرخارجہ کا پیرس سے مطالبہ

میاں محمد ندیم بدھ 22 جولائی 2026 17:19

تہران میں تعینات دو فرانسیسی سفارتکاروں کا طرزِ عمل ناقابل قبول ہے. ..

تہران(اردوپوائنٹ اخبارتازہ ترین-انٹرنیشنل پریس ایجنسی۔22 جولائی ۔2026 ) ایران کے وزیرخارجہ عباس عراقچی نے تہران میں تعینات دو فرانسیسی سفارتکاروں کے طرزِ عمل کو ناقابلِ قبول قرار دیتے ہوئے پیرس سے مطالبہ کیا ہے کہ سفارتی ضابطوں سے متصادم اقدامات کی روک تھام کی جائے. رپورٹ کے مطابق ایرانی وزارتِ خارجہ کا کہنا ہے کہ عباس عراقچی نے اپنے فرانسیسی ہم منصب ژاں نوئل بارو سے ٹیلیفونک گفتگو کے دوران یہ معاملہ اٹھایا دونوں وزرائے خارجہ نے اس موقع پر دوطرفہ، علاقائی اور بین الاقوامی امور پر تبادلہ خیال بھی کیا عراقچی نے دنوں فرانسیسی سفارتکاروں کے طرزِ عمل پر احتجاج کرتے ہوئے کہا کہ ان کے اقدامات تسلیم شدہ سفارتی معیار سے مطابقت نہیں رکھتے. ان کا کہنا تھا کہ غیر ملکی سفارتی مشنز پر میزبان ملک کے قوانین اور ضوابط، نیز بین الاقوامی سطح پر تسلیم شدہ سفارتی اصولوں کی پابندی ضروری ہے انہوں نے فرانسیسی حکومت پر زور دیا کہ وہ مستقبل میں ایسے واقعات کی روک تھام کےلئے ضروری اقدامات کرے۔

(جاری ہے)

ایران اور فرانس کے درمیان سفارتی کشیدگی فرانسیسی وزیر خارجہ کے اس بیان کے بعد سامنے آئی جس میں انہوں نے الزام لگایا تھا کہ ایرانی سکیورٹی اداروں نے تہران میں تعینات دو فرانسیسی سفارتکاروں کو حراست میں لیا اور ان کے ساتھ نامناسب سلوک کیا بارو کا کہنا تھا کہ یہ دونوں سفارتکار ایرانی عوام اور تعلیمی حلقوں کے ساتھ ثقافتی روابط کے فروغ کے ذمہ دار تھے۔بعد ازاں فرانس کی وزارتِ خارجہ نے پیرس میں ایران کے ناظم الامور کو طلب کیا اور اس واقعے پر احتجاج کیا.