ساہیوال میں رشتہ داری کے نام پر فراڈ کی واردات

چچا زاد بھائی نے گردہ ٹرانسپلانٹ کا کہہ کر مریض کے 17 لاکھ 57 ہزار روپے ہڑپ کرلیے

ساجد علی بدھ 22 جولائی 2026 17:50

ساہیوال میں رشتہ داری کے نام پر فراڈ کی واردات

پتوکی / ساہیوال (اُردو پوائنٹ اخبارتازہ ترین۔ 22 جولائی 2026ء) پنجاب کے ضلع ساہیوال میں نو سرباز چچا زاد بھائی نے مریض کو ڈائیلاسز سے بچانے کا لالی پاپ دے کر 17 لاکھ 57 ہزار روپے ہڑپ کرلیے۔ اطلاعات کے مطابق یہ واقعہ ساہیوال کے نواحی چک 138 نو ایل میں پیش آیا، جہاں گردے کے عارضے میں مبتلا شہری کو اپنوں ہی نے لوٹ لیا، متاثرہ زمیندار محمد ارشد کو اس کا چچا زاد بھائی زاہد امیر ڈائیلاسز کے تکلیف دہ مرحلے سے بچانے اور گردے کا ٹرانسپلانٹ کروانے کا آسرا دے کر اسلام آباد لے گیا، نوسرباز زاہد امیر نے گردوں کی پیوند کاری کی مد میں محمد ارشد سے 17 لاکھ 57 ہزار روپے کی نقد رقم وصول کی۔

بتایا جارہا ہے کہ متاثرہ شہری سے رقم ہتھیانے کے بعد ملزم کی جانب سے ٹرانسپلانٹ کے معاملے کو مسلسل لٹکایا گیا، اور آخر کار ملزم رقم لے کر موقع سے فرار ہو گیا، پولیس تھانہ ڈیرہ رحیم نے متاثرہ شہری محمد ارشد کی مدعیت میں نوسرباز چچا زاد بھائی زاہد امیر کے خلاف تعزیراتِ پاکستان کی دفعہ 420 کے تحت مقدمہ درج کر لیا، تاہم ملزم کی گرفتاری ابھی عمل میں نہیں آ سکی۔

(جاری ہے)

دوسری طرف پتوکی کے علاقے پرانی منڈی میں دوستی کے رشتے کو تار تار کر دینے والا واقعہ پیش آیا وہاں ملزم رضا نے اپنے دوست رحمت کو 26 جون کو نوکری کا جھانسہ دے کر مبینہ طور پر اغواء کیا، جس کے بعد ملزمان رحمت کو راولپنڈی لے گئے جہاں اسے نشہ آور مشروب پلا کر بے ہوش کر دیا گیا، ملزمان نے بے ہوشی کی حالت میں رحمت کا گردہ نکال کر فروخت کردیا، نوجوان جب ہوش میں آیا اور اس نے اپنا الٹرا ساؤنڈ کروایا تو اس کے سامنے خوفناک انکشاف ہوا کہ اس کا ایک گردہ غائب ہے، پولیس نے متاثرہ شہری رحمت کی درخواست پر قانونی کارروائی کرتے ہوئے مقدمہ درج کر لیا۔