2300تک لاکھوں برطانوی شہریوں کے گھر پانی میں ڈوب سکتے ہیں، محققین

جمعرات 23 جولائی 2026 17:11

لندن(اُردو پوائنٹ اخبارتازہ ترین - این این آئی۔ 23 جولائی2026ء) سائنسدانوں نے خبردار کیا ہے کہ 2300 تک سمندر میں بڑھتی ہوئی سطح 1.7 ملین برطانوی باشندوں کے گھروں کو پانی میں ڈبونے کا سبب بن سکتی ہے مستقبل میں سطح سمندر کے باعث برطانیہ کے کچھ علاقے ناقابل رہائش قر ار دیے جا سکتے ہیں۔برطانوی ذرائع ابلاغ کے مطابق میٹ آفس اور برسٹل یونیورسٹی کے محققین نے یہ دیکھنے کے لیے کمپیوٹر ماڈلز کا استعمال کیا کہ مستقبل میں موسمیاتی تبدیلی سے کتنے لوگ ساحلی سیلاب کے خطرے میں ہوں گے، تحقیق کے نتائج میں یہ بات سامنے آئی ہے کہ2300 اختتام تک کم از کم نصف ملین مزید لوگ سیلاب کی زد میں آئیں گے۔

محققین نے خبردار کیا ہے کہ یہ ڈرامائی تبدیلیاں روکنے کیلئے آنیوالی دہائیوں میں وسیع پیمانے پر اقدامات کرنا ناگزیر ہیں یہاں تک کہ اگر دنیا کے تمام کاربن کے اخراج کے وعدے پورے کر لیے جائیں تو 2200 تک 1.4 ملین سے زیادہ لوگ سیلاب کے خطرے سے دوچار ہوں گے، جو 2300 تک مزید 0.3 ملین بڑھ جائیں گے۔

(جاری ہے)

تحقیق خاص طور پر واش اور ہمبر ایسٹوری میں رہنے والے لوگوں کے لیے بری خبر ہوسکتی ہے جو مستقبل کے ساحلی سیلاب کے لیے ہاٹ سپاٹ کے طور پر نمایاں ہیں۔

برسٹول یونیورسٹی کے سرکردہ مصنف پروفیسر میٹ پامر کا کہناتھا کہ دنیا کے سمندر اور برف سے ڈھکے ہوئے حصے گلوبل وارمنگ کے لیے بہت سست روی کا مظاہرہ کرتے ہیں۔ان کا کہنا تھا کہ جیسے جیسے انسانوں کی وجہ سے موسمیاتی تبدیلیوں کی وجہ سے آب و ہوا گرم ہو رہی ہے سمندر کی سطح بتدریج تیز رفتاری سے بڑھ رہی ہے عالمی سطح پر، 1999 سے لے کر اب تک اوسط سطح سمندر میں 3.64 ملی میٹر سالانہ اضافہ ہوا ہے۔