کل جماعتی حریت کانفرنس آزاد کشمیر کا سیالان پونچھ کے شہدا کو 28ویں یوم شہادت پرخراج عقیدت

پیر 3 اگست 2026 17:15

اسلام آباد (اُردو پوائنٹ اخبارتازہ ترین - اے پی پی۔ 03 اگست2026ء) کل جماعتی حریت کانفرنس آزاد کشمیر شاخ نے سیالان پونچھ قتل عام کے شہدا کو 28 ویں یوم شہادت پر انہیں شاندار خراج عقیدت پیش کیا ہے۔کشمیرمیڈیاسروس کے مطابق کل جماعتی حریت کانفرنس آزاد کشمیر شاخ نے پیر کو اسلام آباد میں اپنے دفتر میں سیالان کے شہدا کو خراج عقیدت پیش کرنے کے لیے سیمینار کا انعقاد کیا جس کی صدارت کنوینئر غلام محمد صفی نے کی۔

بھارتی فوجیوں نے 3 اور 4 اگست 1998 کی درمیانی شب ضلع پونچھ میں سرنکوٹ کے علاقے سیالان میں شہید امتیاز احمد شیخ جسے میجر گل کے نام سے جانا جاتا ہے، کے خاندان کے 19 افراد کو شہید کیاتھا۔شہدا میں لسہ شیخ، احمد دین شیخ اور حسن محمد کے خاندانوں کے مرد، خواتین اور بچے شامل ہیں۔

(جاری ہے)

حریت رہنمائوں نے سیمینار سے خطاب کرتے ہوئے افسوس کا اظہار کیا کہ شہدا کے اہل خانہ 28 سال بعد بھی انصاف سے محروم ہیں۔

انہوں نے کہا کہ قاتلوں کے خلاف شدید عوامی احتجاج کے بعد مقدمہ درج کیا گیا لیکن مجرموں کو آج تک سزا نہیں دی گئی اور وہ آزاد گھوم رہے ہیں۔مقررین نے کہا کہ اس قتل عام سے تقریباً ایک ہفتہ قبل 25 جولائی 1998 کو بھارتی فوجیوں نے رات کی تاریکی میں ضلع ڈوڈہ کے علاقے کوتل میں تین خواتین، ایک مرد اور ایک بچے سمیت ایک ہی خاندان کے پانچ افراد کو بے دردی سے شہیدکیاتھا۔حریت رہنمائوں نے کہا کہ شہدا کی عظیم قربانیاں کبھی رائیگاں نہیں جائیں گی اور کشمیری بھارتی تسلط سے ضرور آزادی حاصل کریں گے۔ انہوں نے عالمی برادری سے اپیل کی کہ وہ جموں و کشمیر میں بھارتی ریاستی دہشت گردی بند کرانے کے لئے اپنا کردار ادا کرے ۔