عوام کو صحت کی معیاری اور بروقت سہولیات کی فراہمی حکومت بلوچستان کی اولین ترجیح ہے،ڈاکٹر عبدالشکور

پیر 3 اگست 2026 21:16

کوئٹہ (اُردو پوائنٹ اخبارتازہ ترین - اے پی پی۔ 03 اگست2026ء) ایڈیشنل ڈپٹی کمشنرگوادرجنرل ڈاکٹر عبدالشکور نے پاکستان پیرا میڈیکل ایسوسی ایشن ضلع گوادر کے وفد سے ملاقات کی، جس میں ملازمین کی حاضری، تنخواہوں میں کٹوتیوں، محکمانہ کارروائیوں اور صحت کے شعبے میں خدمات کی فراہمی سے متعلق مختلف امور پر تبادلہ خیال کیا گیا۔ایڈیشنل ڈپٹی کمشنر نے وفد کو یقین دلایا کہ محکمہ صحت گوادر کو ہدایت کی جائے گی کہ محکمانہ نظم و ضبط کی کارروائیوں میں قواعد و ضوابط، سرکاری پالیسی اور مقررہ طریقہ کار پر مکمل عملدرآمد یقینی بنایا جائے تاکہ تمام ملازمین کے ساتھ قانون کے مطابق منصفانہ رویہ اختیار کیا جا سکے۔

انہوں نے واضح کیا کہ عوام کو صحت کی معیاری اور بروقت سہولیات کی فراہمی حکومت بلوچستان کی اولین ترجیح ہے، لہٰذا سرکاری اداروں میں غیر حاضری کسی صورت برداشت نہیں کی جائے گی۔

(جاری ہے)

انہوں نے تمام ملازمین کو ہدایت کی کہ صوبائی محکمہ صحت کے مقرر کردہ آن لائن حاضری نظام کے ذریعے اپنی حاضری باقاعدگی سے یقینی بنائیں تاکہ آئندہ کسی قسم کی دشواری یا انتظامی مسئلہ پیدا نہ ہو۔

انہوں نے مزید کہا کہ آن لائن حاضری میں غفلت یا عدم تعمیل کی صورت میں ضلعی محکمہ صحت قواعد کے مطابق متعلقہ اہلکاروں کے خلاف کارروائی کرنے کا مجاز ہوگا۔پیرا میڈیکل ایسوسی ایشن کے وفد نے یقین دہانی کرائی کہ آئندہ تمام ملازمین آن لائن حاضری کے نظام پر مکمل عملدرآمد کو یقینی بنائیں گے اور عوام کو بہتر طبی خدمات کی فراہمی کے لیے اپنی ذمہ داریاں مزید احسن انداز میں انجام دیں گے۔

اجلاس کے اختتام پر ایڈیشنل ڈپٹی کمشنر نے ڈسٹرکٹ ہیلتھ آفیسر ڈاکٹر یاسر طاہر سے ٹیلیفونک رابطہ کیا اور وفد کو ہدایت کی کہ وہ اپنے مسائل کے خوش اسلوبی سے حل کے لیے ڈسٹرکٹ ہیلتھ آفیسر سے ان کے دفتر میں ملاقات کرے، جبکہ اس سلسلے میں پیش رفت سے ضلعی انتظامیہ کو بھی آگاہ رکھا جائے گا۔ضلعی انتظامیہ نے اس عزم کا اعادہ کیا کہ سرکاری ملازمین کے جائز مسائل کو قانون کے مطابق حل کرنے کے ساتھ ساتھ عوام کو صحت کی معیاری، بروقت اور بلا تعطل سہولیات کی فراہمی ہر صورت یقینی بنائی جائے گی۔