صوبائی وزیر منشاء اللہ بٹ کی زیر صدارت پنجاب سوشل سکیورٹی اور لیبر ویلفیئر ڈیپارٹمنٹ بہاولپور کی کارکردگی کا جائزہ اجلاس

لاہور (اُردو پوائنٹ اخبارتازہ ترین - این این آئی۔ 07 اگست2026ء) صوبائی وزیر لیبر و افرادی قوت محمد منشاء اللہ بٹ کی زیر صدارت بہاولپور میں ڈائریکٹوریٹ آف پنجاب سوشل سکیورٹی اور لیبر ویلفیئر ڈیپارٹمنٹ کی کارکردگی کا جائزہ اجلاس منعقد ہوا۔اجلاس میں صوبائی وزیر کو پنجاب سوشل سکیورٹی اور لیبر ویلفیئر ڈیپارٹمنٹ کے جاری ترقیاتی منصوبوں، انتظامی امور اور محنت کشوں کی فلاح و بہبود کے لیے کیے جانے والے اقدامات پر تفصیلی بریفنگ دی گئی۔

بریفنگ میں بتایا گیا کہ پنجاب سوشل سکیورٹی بہاولپور میں تقریبا 25000 محنت کش رجسٹرڈ ہیں اور بی ایچ یو سہولت کو اپ گریڈ کرتے ہوئے منی ہسپتال بنانے کی ضرورت ہے،چائلڈ لیبر کے انسداد اور محنت کشوں کی ہیلتھ اینڈ سیفٹی قوانین پر عملدرآمد کو یقینی بنایا جارہا ہے اور خلاف ورزی کی صورت میں قانونی کارروائی عمل میں لائی جا رہی ہے۔

(جاری ہے)

اجلاس میں مختلف منصوبوں کی پیش رفت، سروس ڈلیوری اور ادارہ جاتی کارکردگی کا جائزہ لیا گیا۔

چوہدری مسعود مجید سابقہ ایم این اے نے اجلاس میں شرکت کی اور صوبائی وزیر کو محنت کشوں کو درپیش مسائل کے حل کے لیے اپنی تجاویز سے آگاہ کیا۔ صوبائی وزیر محمد منشاء اللہ بٹ نے متعلقہ افسران کو ہدایت کی سوشل سکیورٹی کی موجودہ بی ایچ یو ڈسپنسری کو بطور منی ہسپتال اپ گریڈ کرنے کے لیے اقدامات کیے جائیں اور متعلقہ حکام کو عملدرآمد رپورٹ جمع کرانے کی ہدایت کی انہوں نے ضلع بہاولپور میں محنت کشوں کی بچیوں کو بہتر تعلیمی ماحول فراہم کرنے کی خاطر ورکرز ویلفیئر سکول برائے طالبات کی عمارت کے قیام کی تجویز سے اتفاق کرتے ہوئے سیکرٹری پنجاب ورکر ویلفیئر بورڈ سے فزیبلٹی رپورٹ طلب کرلی ہے۔

صوبائی وزیر لیبر نے اس امر پر بھی زور دیا کہ محنت کشوں کو فراہم کی جانے والی تمام سہولیات کی بلا تعطل فراہمی ہر صورت یقینی بنائی جائے اور اس ضمن میں کسی قسم کی کوتاہی برداشت نہیں کی جائے گی۔صوبائی وزیر نے کہا کہ وزیر اعلیٰ پنجاب مریم نواز شریف کے وژن کے مطابق محنت کش طبقے کی فلاح و بہبود کے لیے عملی اقدامات کیے جارہے ہیں.کم از کم اجرت کی ہر صورت ادائیگی حکومت کی اولین ترجیحات میں شامل ہے۔

انہوں نے متعلقہ افسران کو ہدایت کی کہ کم از کم اجرت پر مؤثر عملدرآمد یقینی بنانے کے لیے تمام ممکنہ اقدامات کیے جائیں اور اس سلسلے میں کسی بھی قسم کی غفلت یا لاپروائی ہرگز برداشت نہیں کی جائے گی محنت کشوں کے حقوق کا تحفظ، انہیں بہتر طبی سہولیات کی فراہمی اور لیبر قوانین پر مؤثر عملدرآمد پر ذور دیتے ہوئے ان کا کہنا تھا کہ کہ تمام متعلقہ افسران اپنی ذمہ داریاں پوری دیانتداری اور پیشہ ورانہ انداز میں انجام دیں۔