جشن عید میلاد النبی ؐ کے موقع پر آتش بازی کی مکمل ممانعت ہو گی

جہانیاں(اُردو پوائنٹ اخبارتازہ ترین - این این آئی۔ 13 اگست2026ء) ماہ ربیع الاوّل کا آغاز،تحصیل امن کمیٹی جہانیاں کا خصوصی اجلاس،انتظامات کا جائزہ لیا گیا۔ایس ڈی پی او سرکل جہانیاں ملک عبدالمجید نے کہا ہے کہ حضور اکرم ؐ کی ولادت انسانیت پر اللہ تعالیٰ کا عظیم احسان ہے، جشن عید میلاد النبی ؐکے موقع پرجہانیاں شہر،ٹھٹھہ صادق آباد سمیت تحصیل بھر میں جلوسوں اور محافل میلاد کی سکیورٹی کیلئے تمام دستیاب وسائل بروئے کار لا کر فول پروف انتظامات کیے جائیں گے، ممبران امن کمیٹی،علماء کرام اور تاجرحضرات اپنا فعال کردار ادا کریں،جشن عید میلاد النبی ؐ کے موقع پر آتش بازی کی مکمل ممانعت ہو گی،موٹر سائیکلوں کے سائلنسر نکالنے والے اور ون ویلنگ کرنے والوں کے خلاف خصوصی پولیس فورس تعینات کی جائے گی،کسی قسم کی غیر شرعی حرکات کی قطعی اجازت نہیں ہو گی،امن وامان کی صورتحال برقرار رکھنے کیلئے جہانیاں ٹھٹھہ صادق آباد روڈ اور دیگر علاقوں میں پولیس و ایلیٹ فورس گشت کناں ہوگی۔

(جاری ہے)

انہوں نے ان خیالات کا اظہار اپنے آفس میں عید میلاد النبی ؐ کے حوالے سے تحصیل امن کمیٹی ممبران کے اجلاس کے شرکاء سے خطاب کرتے ہوئے کیا۔اس موقع پرانچارج تھانہ جہانیاں راشد جٹ،چوہدری خادم حسین، سید علی رضا شاہ،خالد محمود بھٹی،محمد عارف سعید،آغا سید نذیر احمد شاہ،محمد شریف تونسوی سمیت دیگر موجود تھے۔اجلاس میں ممبران امن کمیٹی کو 12ربیع الاوّل کے سلسلے میں مرکزی چوک جہانیاں،بائی پاس،جامع مسجد جیلانی اور ٹھٹھہ صادق آباد سمیت مختلف علاقوں سے نکلنے والے عید میلاد النبی ؐ کے جلوسوں،مقررہ روٹ اور اوقات کار کے متعلق تفصیل سے بریفنگ دی گئی جبکہ ایس ڈی پی ملک عبدالمجید نے بتایاکہ بارہ ربیع الاوّل کے جلوسوں اور رات کو چراغاں کے موقع پر شہر میں کسی قسم کی بھی ہلڑ بازی کی اجازت نہ ہو گی ایسے افراد کے خلاف کاروائی کیلئے ایلیٹ فورس کو خصوصی اختیارات دیے جائیں گے،ٹریفک پولیس اور لیڈیز پولیس کی سپیشل ڈیوٹیاں لگائی جائیں گی جبکہ کمیٹی چوک،ڈی پی ایس چوک،مدینہ چوک اور پیر پٹھان بازار کی جانب سے بارہ ربیع الاوّل کی شب موٹر سائیکلوں اور کار سواروں کے داخلے پر پابندی عائد کی جائے گی۔

ممبران امن کمیٹی کی جانب سے پولیس کے ساتھ مکمل تعاون کا یقین دلایا گیا۔