Live Updates

پیٹرولیم ڈیلرز ایسوسی ایشن کی ہڑتال کی دھمکی کام کر گئی،حکومت نے مارجن بڑھا دیا

جمعہ 14 اگست 2026 21:38

کراچی(اُردو پوائنٹ اخبارتازہ ترین - این این آئی۔ 14 اگست2026ء) پاکستان پیٹرولیم ڈیلرز ایسوسی ایشن کی ہڑتال کی دھمکی کام کر گئی۔ حکومت نے پیٹرولیم ڈیلرز کا مارجن 1 روپے 34 پیسے بڑھا کر مجموعی مارجن 10 روپے کر دیا۔ 8فیصد کا مطالبہ کرنے والی پی پی ڈی اے نے 1 روپے 34 پیسے لینے کے بعد ہڑتال ملتوی کر دی۔ کراچی میں چیئرمین پی پی ڈی اے ملک خدا بخش نے ہنگامی پریس کانفرنس کرتے ہوئے کہا کہ گزشتہ روز کے اسلام آباد مذاکرات کی تلخی کے بعد وزیرِ پیٹرولیم نے ٹیلیفونک رابطے میں اطلاع دی ہے کہ وزیراعظم سے ڈیلر مارجن میں 1 روپے 34 پیسے کے اضافے کو منظور کروا لیا گیا ہے اور وزیرِ اعظم کی سمری کو ای سی سی میں بھی بھجوا دیا گیا ہے۔

انہوں نے ساتھ ہی یہ خوشخبری بھی سنائی کہ روزانہ پیٹرولیم مصنوعات کی قیمتوں میں ردوبدل کے حوالے سے بھی وزیرِ اعظم کو نئی سمری بھجوائی گئی ہے جس کے مطابق مشرق وسطیٰ میں جنگی صورتحال میں کمی کی وجہ سے پیٹرولیم مصنوعات کی قیمتیں پہلے کی طرح 7 یا 15 روز پر متعین کی جا سکتی ہیں۔

(جاری ہے)

پریس کانفرنس میں ایسوسی ایشن کے وائس چیئرمین ملک شیر خان،طارق حسن،انورکمال ،صدر کراچی ڈویژن سعید خان اور دیگر بھی موجود تھے۔

ملک خدا بخش نے کہا کہ ڈیلرز کے 8 فیصد مارجن کے مطالبے پر ایک مشترکہ کمیٹی بنائی گئی ہے جو 30 روز میں اپنی رپورٹ پیش کرے گی۔چیئرمین پی پی ڈی اے نے کہا کہ ہم نے حکومت کی یقین دہانیوں پر ہفتے کو ہونے والی ہڑتال ملتوی کی ہے اور جب تک ہمارے تمام مطالبات منظور نہیں ہوجاتے اپنا احتجاج جاری رکھیں گے۔ نائب چیئرمین طارق حسن نے کہا کہ تین سال سے مارجن نہ ملنے کے سبب حکومت کے پاس ڈیلرز کے 50 ملین ڈالر رکے ہوئے ہیں۔نائب چیئرمین انور کمال نے کہا کہ حکومت نے ملک بھر کے تمام پیٹرول پمپس کو ڈیجیٹائز کرنے کیلئے 23 مارچ 2027ء تک کی مہلت دی ہے، اور یہ ذمہ داری او ایم سیز پر عائد کی ہے۔ انہوں نے بتایا کہ ملک بھر میں 14 ہزار پیٹرول پمپس میں سے صرف 10 فیصد پمپس ڈیجیٹائز ہیں۔