وزیراعلیٰ بلوچستان میر سرفراز بگٹی نے آج چمن میں اسپیکر بلوچستان اسمبلی کیپٹن (ر) عبدالخالق اچکزئی کی رہائش گاہ پر حاضری دی

جمعہ 14 اگست 2026 21:06

چمن (اُردو پوائنٹ اخبارتازہ ترین - آن لائن۔ 14 اگست2026ء) وزیراعلیٰ بلوچستان میر سرفراز بگٹی نے آج چمن میں اسپیکر بلوچستان اسمبلی کیپٹن (ر) عبدالخالق اچکزئی کی رہائش گاہ پر حاضری دی اور ان کے جواں سال صاحبزادے ثناء اللہ کے گزشتہ روز انتقال پر اسپیکر بلوچستان اسمبلی اور اہلِ خانہ سے دلی تعزیت اور گہرے رنج و غم کا اظہار کیا۔وزیراعلیٰ میر سرفراز بگٹی نے مرحوم کے لیے فاتحہ خوانی کی اور مغفرت، بلندیِ درجات اور ایصالِ ثواب کے لیے دعا کی۔

(جاری ہے)

انہوں نے کہا کہ جواں سال بیٹے کا انتقال والدین اور اہلِ خانہ کے لیے انتہائی صدمے اور کرب کا باعث ہوتا ہے، وہ اس مشکل اور غم کی گھڑی میں اسپیکر بلوچستان اسمبلی اور سوگوار خاندان کے دکھ میں برابر کے شریک ہیں۔وزیراعلیٰ نے دعا کی کہ اللہ تعالیٰ مرحوم ثناء اللہ کو جنت الفردوس میں اعلیٰ مقام عطا فرمائے، ان کی مغفرت فرمائے اور اسپیکر بلوچستان اسمبلی سمیت تمام لواحقین کو یہ ناقابلِ تلافی صدمہ صبر و استقامت کے ساتھ برداشت کرنے کی توفیق عطا فرمائے۔