جیمز اینڈ جیولری شعبے کی برآمدی استعداد بڑھانے کیلئے جدید مہارتوں کا فروغ ناگزیر ہے، صدر آر سی سی آئ

منگل 18 اگست 2026 20:53

راولپنڈی (اُردو پوائنٹ اخبارتازہ ترین - اے پی پی۔ 18 اگست2026ء) راولپنڈی چیمبر آف کامرس اینڈ انڈسٹری (آر سی سی آئی) کے زیر اہتمام جیمز اینڈ جیولری کے شعبے سے متعلق خصوصی تربیتی سیشن کا انعقاد کیا گیا، جس میں شعبے میں مہارتوں کے فروغ، جدید طریقہ کار، ویلیو ایڈیشن اور ترقی کے نئے مواقع پر روشنی ڈالی گئی۔اس موقع پر صدر آر سی سی آئی عثمان شوکت نے کہا کہ پاکستان کی جیمز اینڈ جیولری صنعت کی مسابقتی استعداد بڑھانے اور برآمدی صلاحیت سے بھرپور استفادہ کرنے کیلئے جدت، جدید ڈیزائن، ویلیو ایڈیشن اور فنی مہارتوں کے فروغ پر خصوصی توجہ دینا ہوگی۔

انہوں نے کہا کہ جدید تربیت اور نئی تکنیکوں سے استفادہ کرکے اس شعبے کو عالمی منڈی میں مزید مؤثر انداز میں متعارف کرایا جا سکتا ہے۔

(جاری ہے)

تربیتی سیشن میں سینئر نائب صدر آر سی سی آئی خالد فاروق قاضی، نائب صدر فہد برلاس، ایگزیکٹو کمیٹی کے اراکین، چیمبر ممبران اور جیمز اینڈ جیولری کے شعبے سے وابستہ بڑی تعداد میں اسٹیک ہولڈرز نے شرکت کی۔صدر آر سی سی آئی نے کہا کہ چیمبر کاروباری برادری کو جدید معلومات، تربیت اور استعداد کار میں اضافے کے مواقع فراہم کرنے کیلئے اپنا کردار جاری رکھے گا۔ انہوں نے کہا کہ علم، جدت اور صلاحیتوں میں اضافے کے ذریعے کاروباری اداروں کو عالمی معیار کے مطابق بنانے اور ملکی برآمدات میں اضافہ ممکن ہے۔