پٹرولیم مصنوعات کی قیمتوں میں مسلسل اضافہ ، مزدوروں کی اجرت میں بھی ماہانہ اضافہ کیا جائے ،خان زمان

بدھ 19 اگست 2026 22:05

کوئٹہ(اُردو پوائنٹ اخبارتازہ ترین - این این آئی۔ 19 اگست2026ء) بلوچستان لیبر فیڈریشن کے صدر خان زمان ، چیئر مین حاجی بشیر احمد رند ، سیکرٹری جنرل قاسم خان کاکڑ، حاجی عبدالعزیز شاہوانی ، عابد بٹ ، محمد عمر جتک ، عارف خان نیچاری ، دین محمد محمد حسنی ، ملک وحید کاسی ، ملک محمد حسین بنگلزئی ، ظفر خان رند ، سید منظور شاہ فضل محمد یوسفزئی ، انجینئر نجیب اللہ مری و دیگر رہنماؤں نے پٹرولیم مصنوعات کی قیمتوں میں مسلسل اضافے پر شدید تشویش کا اظہار کرتے ہوئے کہا ہے کہ پٹرولیم مصنوعات کی قیمتوں میں روزانہ کی بنیاد پر اضافہ عوام اور خصوصاً مزدور اور محنت کش طبقے کے لیے ناقابل برداشت بوجھ بنتا جا رہا ہے۔

پٹرولیم مصنوعات کی قیمتیں 400 روپے فی لیٹر تک پہنچنے والے ہیں جس سے مہنگائی کا طوفان مزید شدت اختیار کر گیا ہے۔

(جاری ہے)

فیڈریشن ہذا کے رہنماؤں نے کہا کہ پٹرولیم مصنوعات کی قیمتوں میں اضافے کے براہ راست اثرات اشیائے خوردو نوش ، ٹرانسپورٹ ، بجلی ، گیس اور روزمرہ استعمال کی دیگر ضروری اشیائ کی قیمتوں پر پڑتے ہیں ، جس سے غریب اور متوسط طبقہ شدید متاثر ہو رہا ہے۔

انہوں نے کہا کہ ایک طرف مہنگائی میں مسلسل اضافہ ہو رہا ہے جبکہ دوسری جانب مزدوروں اور محنت کشوں کی اجرت اور تنخواہوں میں اس تناسب سے کوئی اضافہ نہیں کیا جا رہا۔ موجودہ حالات میں مقررہ تنخواہ پر گزارا کر نا مزدور طبقے کے لیے انتہائی مشکل ہو چکا ہے۔ بلوچستان لیبر فیڈریشن حکومت سے مطالبہ کرتی ہے کہ پٹرولیم مصنوعات کی قیمتوں میں اضافے اور بڑھتی ہوئی مہنگائی کو مد نظر رکھتے ہوئے مزدوروں اور تمام محنت کشوں کی تنخواہوں اور اجرتوں میں بھی ماہانہ بنیادوں پر مہنگائی کے تناسب سے اضافہ کیا جائے۔

اور ضروری اشیائے خوردو نوش کی قیمتوں کو کنٹرول کیا جائے ، عوام اور مزدوروں کو حقیقی معنوں میں ریلیف فراہم کیا جائے اور پٹرولیم مصنوعات کی قیمتوں میں مسلسل اضافے کا سلسلہ روکا جائے۔