پاکستان کے دیگر صوبوں کے مقابلے میں آزاد جموں و کشمیر میں معیار زندگی بہتر

بجلی، آٹے کے نرخ سے لیکر سڑکوں کے نیٹ ورک، نظامِ تعلیم، صحت اور ٹیلی کمیونیکیشن ودیگر شعبے پاکستان سے بہتر ہیں،شہریوں کی گفتگو

منگل 25 اگست 2026 13:09

مظفرآباد(اُردو پوائنٹ اخبارتازہ ترین - این این آئی۔ 25 اگست2026ء) آزاد کشمیر کے شہریوں نے اعداد وشمار کی روشنی میں پاکستان کے دیگر صوبوں کے مقابلے میں دستیاب بنیادی سہولیات کو بہترین قرار دیدیا۔آزاد جموں و کشمیر کے شہریوں کے مطابق یہاں پر بجلی، آٹے کے نرخ سے لے کر سڑکوں کے نیٹ ورک، نظامِ تعلیم، صحت اور ٹیلی کمیونیکیشن سمیت کئی شعبے پاکستان کے دیگر حصوں سے بہتر ہیں، آزاد کشمیر میں بجلی کا بنیادی ریٹ تقریباً 3 روپے فی یونٹ ہے، جبکہ پاکستان کے دیگر علاقوں میں ٹیکسز، سرچارجز اور ایڈجسٹمنٹس کے باعث بجلی کئی گنا مہنگی ہے۔

آٹے کے معاملے میں بھی آزاد کشمیر کی عوام کو نمایاں ریلیف حاصل ہے، جہاں 20 کلو آٹے کا تھیلا 1100 روپے میں فراہم کیا جا رہا ہے، دشوار گزار جغرافیے کے باوجود آزاد جموں و کشمیر میں سڑکوں کا وسیع نیٹ ورک موجود ہے۔

(جاری ہے)

شہریوں نے کہا کہ تعلیم کے شعبے میں آزاد کشمیر کی شرحِ خواندگی تقریباً 77.8 فیصد ہے، جو پاکستان کے دیگر صوبوں سے بلند ہے، آزادکشمیر کے چھوٹے سے خطے پر سیکڑوں کالجز اور متعدد جامعات موجود ہیں جو تعلیمی سہولیات کی بہتر صورتحال ظاہر کرتی ہی۔علاوہ ازیں، دور افتادہ پہاڑی علاقوں کے باوجود نیلم ویلی، جہلم ویلی اور دیگر علاقوں تک موبائل اور ٹیلی کمیونیکیشن کی سہولیات بھی پہنچ چکی ہیں۔