آئی سی سی نے یو اے ای کرکٹر آصف خان پر 15 ماہ کی پابندی عائد کردی

آئی سی سی کے مطابق آصف خان کا 8 ستمبر 2025 کو ڈوپ ٹیسٹ لیا گیا تھا جس میں ممنوعہ مواد کی موجودگی ظاہر ہوئی تھی

ذیشان مہتاب جمعرات 27 اگست 2026 15:45

آئی سی سی نے یو اے ای کرکٹر آصف خان پر 15 ماہ کی پابندی عائد کردی

دبئی (اردو پوائنٹ تازہ ترین اخبار ۔ 27 اگست 2026ء ) انٹرنیشنل کرکٹ کونسل (آئی سی سی) کی جانب سے متحدہ عرب امارات (یو اے ای) کے بیٹر آصف خان پر 15 ماہ کی پابندی عائد کردی۔

آئی سی سی کے مطابق آصف خان کا 8 ستمبر 2025ء کو ڈوپ ٹیسٹ لیا گیا تھا جس میں ممنوعہ مواد کی موجودگی ظاہر ہوئی تھی۔

یو اے ای کے 36 سالہ آصف خان نے آئی سی سی اینٹی ڈوپنگ کوڈ کے آرٹیکل 2.1 کی خلاف ورزی کا اعتراف کرتے ہوئے 15 ماہ کی پابندی قبول کرلی۔

(جاری ہے)

آئی سی سی کے مطابق آصف خان پر 15 ماہ کی پابندی 8 ستمبر 2025ء سے شمار ہوگی جو 7 دسمبر 2026ء تک جاری رہے گی۔

اینٹی ڈوپنگ قوانین کے تحت آصف خان کے 8 ستمبر 2025ء سے 29 دسمبر 2025ء تک کے انفرادی نتائج بھی منسوخ کردیے گئے ہیں، اس کے نتیجے میں اس عرصے کے دوران حاصل کیے گئے تمغے، پوائنٹس، انعامی رقم اور دیگر انعامات بھی واپس لیے جائیں گے۔

آصف خان نے 2022ء میں متحدہ عرب امارات کی جانب سے اپنے بین الاقوامی کیریئر کا آغاز کیا تھا۔

وہ اب تک یو اے ای کی نمائندگی کرتے ہوئے 38 ون ڈے انٹرنیشنل اور 56 ٹی ٹونٹی انٹرنیشنل میچز کھیل چکے ہیں۔