ویمنز ایشیا کپ 2026; TPT 360 کو آفیشل براڈکاسٹ پروڈکشن کی ذمہ داری مل گئی

اعجاز احمد گوندل جمعہ 28 اگست 2026 17:22

ٹرانس گروپ FZE یو اے ای کے ذیلی ادارے TPT 360 کو ایشین کرکٹ کونسل کے زیرِ اہتمام ڈی پی ورلڈ ویمنز ایشیا کپ 2026 کی آفیشل براڈکاسٹ پروڈکشن کی ذمہ داری سونپ دی گئی ہے۔
ٹی20 فارمیٹ پر مشتمل ویمنز ایشیا کپ میں مجموعی طور پر 15 میچز کھیلے جائیں گے، جن کا انعقاد دبئی کرکٹ اسٹیڈیم میں 28 اگست سے 13 ستمبر 2026 تک ہوگا۔
ٹورنامنٹ کی براڈکاسٹ پروڈکشن کے لیے جدید ملٹی کیمرا سیٹ اپ استعمال کیا جائے گا، جس میں سپر سلو موشن اور اسپن وژن کیمرے بھی شامل ہوں گے۔

(جاری ہے)

براڈکاسٹ میں جدید GV LDX 150 کیمروں، Zing Stumps اور ایشیا کپ کے لیے خصوصی طور پر تیار کردہ جدید گرافکس کا استعمال کیا جائے گا۔
TPT 360 کے چیف ایگزیکٹو آفیسر معید جاوید نے کہا کہ کمپنی کو ڈی پی ورلڈ ویمنز ایشیا کپ 2026 کی آفیشل براڈکاسٹ پروڈکشن فراہم کرنے پر فخر ہے۔ ان کے مطابق مقصد شائقین تک کھیل کا جوش اور سنسنی بہترین معیار کی کوریج کے ذریعے پہنچانا اور ویمنز کرکٹ کے ٹیلنٹ اور مسابقت کو نمایاں کرنا ہے۔
TPT 360 اور ٹرانس گروپ نے ویمنز کرکٹ کی ترقی اور اس کی عالمی سطح پر پذیرائی کے لیے اپنے عزم کا اظہار کیا ہے۔ کمپنی اس سے قبل 2024 میں ملائیشیا میں اے سی سی انڈر 19 ویمنز ایشیا کپ کی براڈکاسٹ پروڈکشن بھی کامیابی سے فراہم کر چکی ہے۔