وزیرِ مملکت محمد عون چوہدری کا پاکستانی قونصل خانے کا دورہ

اعجاز احمد گوندل جمعہ 28 اگست 2026 17:25

اوورسیز پاکستانیوں اور انسانی وسائل کی ترقی کے وزیرِ مملکت محمد عون چوہدری نے دبئی میں پاکستان کے قونصلیٹ جنرل کا دورہ کیا، جہاں قونصل جنرل پاکستان حسین محمد اور قونصل خانے کے افسران نے ان کا پرتپاک استقبال کیا۔
دورے کے دوران وزیرِ مملکت نے متحدہ عرب امارات میں مقیم پاکستانی کمیونٹی کو سہولیات کی فراہمی کے لیے قونصل خانے کی ٹیم کی کاوشوں کو سراہا۔

(جاری ہے)

محمد عون چوہدری نے قونصل خانے کے افسران کے ساتھ تفصیلی اور تعمیری اجلاس بھی کیا، جس میں پاکستانی کمیونٹی کے لیے اسکلز ٹریننگ میں بہتری، کمیونٹی آگاہی کے اقدامات کو مزید مؤثر بنانے اور عوام کو بہتر سہولیات و خدمات کی فراہمی کی اہمیت پر زور دیا گیا۔
وزیرِ مملکت نے قونصل خانے کے مختلف شعبوں کا بھی دورہ کیا جہاں عوام کو قونصلر خدمات فراہم کی جاتی ہیں۔ اس موقع پر انہوں نے متعلقہ حکام سے ان کے کام اور عوام کو خدمات کی فراہمی کے طریقہ کار کے بارے میں معلومات حاصل کیں۔
محمد عون چوہدری نے پاکستانی کمیونٹی کو بہتر اور مؤثر قونصلر سہولیات کی فراہمی کے عزم کا اظہار کرتے ہوئے قونصل خانے کے افسران کی خدمات کو سراہا۔