افغانستان پریمیئر لیگ ٹی20 کی تین فرنچائزز اور ’’کوہِ ظفر‘‘ ٹرافی کی رونمائی

اعجاز احمد گوندل جمعہ 28 اگست 2026 17:24

افغانستان پریمیئر لیگ ٹی20 (اے پی ایل ٹی20) نے اپنی افتتاحی لیگ کی تیاریوں کے سلسلے میں تین فرنچائز ٹیموں، ان کے لوگوز اور چیمپئن شپ ٹرافی ’’کوہِ ظفر‘‘ کی باضابطہ رونمائی کردی۔
افتتاحی سیزن میں ایکسل یونائیٹڈ کابل، بلخ ژوانان اور قندھار واریئرز حصہ لیں گی۔ لیگ انتظامیہ کے مطابق یہ فرنچائزز افغان کرکٹ میں ایک نئے دور کا آغاز کریں گی۔

تقریب میں متعارف کرائی جانے والی ’’کوہِ ظفر‘‘ ٹرافی افغانستان کے پہاڑی سلسلوں کی خوبصورتی، مضبوطی اور استقامت سے متاثر ہو کر تیار کی گئی ہے، جو کرکٹ میں کامیابی کی بلند ترین منزل کی علامت قرار دی گئی ہے۔
افغانستان کرکٹ بورڈ کے چیئرمین میروائس اشرف نے کہا کہ فرنچائزز اور ٹرافی کی رونمائی افغان کرکٹ کے لیے ایک اہم موقع ہے۔

(جاری ہے)

انہوں نے کہا کہ لیگ کا مقصد نوجوان کرکٹرز کو ڈسٹرکٹ لیول سے بین الاقوامی سطح تک اپنی صلاحیتیں منوانے کے مواقع فراہم کرنا ہے۔
اے پی ایل ٹی20 کے پلیئر ڈرافٹ کے لیے رجسٹریشن 30 اگست 2026 سے شروع ہوگی جبکہ پلیئر ڈرافٹ 27 ستمبر 2026 کو منعقد کیا جائے گا۔ لیگ کا افتتاحی ٹورنامنٹ 27 دسمبر 2026 سے شروع ہوگا، جبکہ مکمل شیڈول اور وینیوز کا اعلان بعد میں کیا جائے گا۔
فرنچائز مالکان نے لیگ کو افغان کرکٹ کے فروغ، نوجوان ٹیلنٹ کی تلاش اور ملک کے مختلف علاقوں سے باصلاحیت کھلاڑیوں کو پروفیشنل کرکٹ کا پلیٹ فارم فراہم کرنے کی جانب اہم قدم قرار دیا ہے۔