Live Updates

پٹرولیم لیوی، مہنگائی اور بجلی بحران کے خلاف 3 ستمبر کو ملک گیر ہڑتال ہوگی، عبد الواسع

ہڑتال آئینی اور جمہوری حق ہے، جب حکمران عوام کے مسائل اور مشکلات کا ازالہ نہیں کرتے تو عوام اپنی آواز بلند کرنے کا حق رکھتے ہیں، امیر جماعت اسلامی خیبرپختونخوا وسطی

منگل 1 ستمبر 2026 19:30

صوابی (اُردو پوائنٹ اخبارتازہ ترین - این این آئی۔ 01 ستمبر2026ء) جماعت اسلامی خیبر پختونخوا وسطی کے امیر عبد الواسع نے کہا ہے کہ جماعت اسلامی کے امیر حافظ نعیم الرحمن کی اپیل پر پٹرولیم لیوی، مہنگائی، بجلی و گیس بحران، زرعی مسائل اور عوام پر بڑھتے معاشی بوجھ کے خلاف 3 ستمبر کو ملک گیر ہڑتال کی جائے گی، صوابی کی مختلف تاجر تنظیموں نے بھی ہڑتال کی حمایت کا یقین دلایا ہے۔

صوابی پریس کلب میں پریس کانفرنس سے خطاب کرتے ہوئے عبد الواسع نے کہا کہ ہڑتال آئینی اور جمہوری حق ہے، جب حکمران عوام کے مسائل اور مشکلات کا ازالہ نہیں کرتے تو عوام اپنی آواز بلند کرنے کا حق رکھتے ہیں۔ انہوں نے کہا کہ انہیں امید ہے کہ 3 ستمبر کی ہڑتال کامیاب ہوگی اور عوام حکومت کی پالیسیوں کے خلاف بھرپور احتجاج کریں گے۔

(جاری ہے)

اس موقع پر جماعت اسلامی کے ضلعی امیر مفتی مراد احمد، جنرل سیکرٹری محمد علی، واجد علی شاہ ایڈووکیٹ، ریاض علی شاہ، عتیق احمد خان اور دیگر رہنما بھی موجود تھے۔

عبدالواسع نے کہا کہ پٹرولیم لیوی کا عوام کو کوئی فائدہ نہیں، حکومت رواں مالی سال میں پٹرولیم لیوی کی مد میں 1676 ارب روپے وصول کرنے کا ہدف مقرر کرکے عوام پر مسلسل بوجھ ڈال رہی ہے۔ حکومت کو چاہیے کہ عوام پر مزید ٹیکس اور لیوی عائد کرنے کے بجائے اپنے اخراجات اور شاہانہ مراعات کم کرے۔انہوں نے کہا کہ جماعت اسلامی کا احتجاج اور دھرنا ملک بھر میں جاری ہے۔

گزشتہ 16 روز سے مختلف علاقوں میں دھرنے دیے جا رہے ہیں جبکہ اب تقریبا 18 سے 19 اضلاع میں احتجاجی دھرنے جاری ہیں۔ چترال سے کراچی تک مختلف مقامات پر احتجاج کا سلسلہ جاری ہے۔عبدالواسع نے کہا کہ ملک اس وقت پٹرول، بجلی، معاشی صورتحال اور امن و امان سمیت مختلف بحرانوں کا شکار ہے۔ ایسے حالات میں عام آدمی پر مزید بوجھ ڈالنے کے بجائے حکومت کو اپنے غیر ضروری اخراجات کم کرنے چاہئیں۔

قومی اسمبلی اور سینیٹ کے ارکان کی تنخواہوں میں اضافے کا حوالہ دیتے ہوئے انہوں نے کہا کہ ایک طرف مزدور اور غریب طبقہ مہنگائی سے پریشان ہے جبکہ دوسری جانب حکمران طبقے کی مراعات میں اضافہ کیا جا رہا ہے۔ عبد الواسع نے کہا کہ سرکاری افسران، بڑے افسران، جرنیلوں، ججوں اور وزرا کو پٹرول کی مختلف سہولیات اور کوٹے حاصل ہیں، جبکہ عام آدمی پٹرول کی بڑھتی قیمتوں کا بوجھ برداشت کر رہا ہے۔عبد الواسع نے کہا کہ صوابی کی مختلف تاجر تنظیموں نے 3 ستمبر کی ہڑتال کی حمایت کا یقین دلایا ہے۔