کمشنر کراچی کی زیر صدارت شہر کی تزئین و آرائش اور صفائی ستھرائی کے حوالہ سے اجلاس

کراچی (اُردو پوائنٹ اخبارتازہ ترین - اے پی پی۔ 02 ستمبر2026ء) کمشنر کراچی سید حسن نقوی کی زیر صدارت شہر کی تزئین و آرائش اور صفائی ستھرائی کے حوالہ سے اجلاس منعقد ہوا۔ بدھ کو منعقدہ اجلاس میں کراچی انتظامیہ نے ریڈ زون اور شاہراہ فیصل کو خوبصورت بنانے ، صفائی ستھرائی، تزئین و آرائش کرنے اور روڈ سائیڈ تجاوزات کے خاتمہ کیلئے بلدیہ عظمی ٹائون میونسپل کارپوریشنز کے تعاون سے کام شروع کرنے کا فیصلہ کیا گیا۔

اجلاس میں متعلقہ اسسٹنٹ کمشنرز ،ٹائون میونسپل ایڈ منسٹریشنز کے میونسپل کمشنرز، متعلقہ اداروں کے افسران اوردیگر افسران نے بریفنگ دی۔اجلاس میں ڈپٹی کمشنرز مینجنگ ڈائریکڑ سالڈ ویسٹ مینجمنٹ بورڈ، میونسپل کمشنر بلدیہ عظمی اور متعلقہ اسسٹنٹ کمشنرز اورمیونسپل کمشنرز نے شرکت کی۔

(جاری ہے)

اجلاس میں فیصلہ کیا گیا کہ شاہراہ فیصل پر دو افسران کی نگرانی میں بہتری کا کام کیاجاے گا ۔

ایف ٹی سی سے کارساز تک شاہراہ فیصل پر خوبصورتی کے کام کی نگرانی اسسٹنٹ کمشنر ہیڈ کوارٹرز اقرا جنت کریں گی جبکہ کارساز سے ائر پورٹ تک شاہراہ فیصل پر بہتر ی اور تزئین و آرائش کے کاموں کی نگرانی اسسٹنٹ کمشنر نارتھ ناظم آباد رابعہ سید کریں گی۔اجلاس میں فیصلہ کیا گیا کہ متعلقہ افسران پر مشتمل واٹس اپ گروپ بنایا جاے گا جس میں میونسپل کمشنر بلدیہ عظمی ابرار جعفر، اسسٹنٹ کمشنرز ہیڈ وارٹرز اقرا جنت ،اسسٹنٹ کمشنر رابعہ سید، متعلقہ سب ڈویثرنز کے اسسٹنٹ کمشنرز ٹائونز میونسپل کمشنرز اور متعلقہ اضلاع کے ایڈیشنل ڈپٹی کمشنرز شامل ہوں گے۔

اجلاس میں شاہراہ فیصل پر کچرا، اوپن مین ہولز ، فٹ پاتھوں اور سڑکوں کی ٹوٹ پھوٹ ،روڈ سائیڈ تجاوزات کے خاتمہ مختلف عمارتوں کے سامنے کے حصہ کی صفائی اور ان کی رنگ و روغن کرنے کی ضرورت کی نشاندہی بھی کی گئی ہے۔ اسسٹنٹ کمشنر ہیڈکوارٹرز اقرا جنت نے تصاویر کی مدد سے تفصیلی بریفنگ دیتے ہوئے ایف ٹی سی سے کارساز تک بیوٹی فیکشن اور بہتری کے کاموں کے لئے ایک سو سے زائد کاموں کی نشاندہی کی جبکہ اسسٹنٹ کمشنر نارتھ ناظم آباد رابعہ سید نے کار ساز سے ائر پورٹ تک شاہراہ فیصل پر مطلوبہ کاموں کے لئے ایک سو پچاس سے زائد کاموں کی نشاندہی کی ہے۔

فیصلہ کیا گیا کہ بہتری اور تزئین و آرائش اور روڈ سائیڈتجاوزات کے خاتمہ سمیت بہتری کے کاموں کوایک ہفتہ میں مکمل کیا جائے گا۔بعد ازاں کمشنر کراچی کی زیر صدارت اجلاس میں بہتری کے کاموں کا جائزہ لیا جائیگا اورمزید بہتری کی منصوبہ بندی کرکے شاہراہ فیصل کو مزید بہتراور خوبصورت بنانے کے اقدامات کئے جائیں گے۔ دریں اثناء کمشنر کراچی کی زیر صدرت ریڈ زون کی خوبصورتی اور تزئین وآارائش کے اقدامات کا جائزہ لینے کے لیے منعقدہ اجلاس میں اسسٹنٹ کمشنر سول لائنز احمد مرتضی نے بتایا کہ مجموعی طورپر سول لائنز میں تین ماڈل روڈز پر بیوٹیفیکشن کا کام کیا جائے گا جن میں بوٹ بیسن سے بلاول چورنگی، دعا چورنگی سے ڈولمن چورنگی اور شان سرکل سے بوٹ بیسن تک شاہراہ شامل ہیں۔

بوٹ بیسن سے بلاول چورنگی روڈ ( خیابانِ سعدی)، پر پہلے ہی کام شروع کیا جا چکا ہے ،بلدیہ عظمی کے تعائون سے یہ منصوبہ مکمل کیا جائے گا۔ شان سرکل پر دونوں اطراف کے فٹ پاتھ کی بہتری کی منصوبہ بندی کی گئی ہے جس کے لئے میڈین بیلٹ کی صفائی ہو چکی ہے، یہاں شجرکاری بھی کی جائے گی جس کے لئے اقدامات کئے جائیں گے۔ پروامینیڈ ، دعا چورنگی بیچ لگژی اوربیچ پارک کی صفائی کا کام بھی کر لیا گیا ہے تاہم سیوریج نظام کی بہتری کے لئے اقدامات کئے جارہے ہیں۔