شارع فیصل، ریڈ زون کی تزئین و آرائش کیلئے ایک ہفتے میں 250 سے زائد کام مکمل کرنے کی ہدایت

جمعرات 3 ستمبر 2026 16:58

کراچی (اُردو پوائنٹ اخبارتازہ ترین - این این آئی۔ 03 ستمبر2026ء) کمشنر کراچی حسن نقوی کی زیر صدارت اجلاس میں شہر کے اہم ترین علاقوں شارع فیصل اور ریڈ زون کی خوبصورتی، تزئین و آرائش اور بنیادی سہولتوں کی بہتری کیلئے اہم اقدامات کا فیصلہ کیا گیا ہے۔اجلاس میں شارع فیصل اور ریڈ زون کے اطراف صفائی ستھرائی، سڑکوں اور فٹ پاتھوں کی مرمت، تجاوزات کے خاتمے اور دیگر ضروری کاموں کا جائزہ لیا گیا۔

اس موقع پر متعلقہ اداروں کو ہدایت کی گئی کہ ایف ٹی سی سے ایئرپورٹ تک مختلف نوعیت کے 250 سے زائد کاموں کی نشاندہی کی جائے۔کمشنر کراچی نے اس سلسلے میں اسسٹنٹ کمشنرز کی نگرانی میں کمیٹی بھی قائم کردی ہے، جو متعلقہ اداروں کے ساتھ مل کر نشاندہی کیے گئے کاموں کی نگرانی کرے گی۔

(جاری ہے)

اجلاس میں فیصلہ کیا گیا کہ شارع فیصل اور ریڈ زون کے اطراف موجود کھلے مین ہولز فوری طور پر بند کیے جائیں گے، جبکہ ٹوٹے پھوٹے فٹ پاتھوں اور سڑکوں کی مرمت کے ساتھ روڈ سائڈ تجاوزات کا خاتمہ بھی کیا جائے گا۔

شارع فیصل پر عمارتوں کے سامنے صفائی ستھرائی اور رنگ و روغن کرانے کی تجویز بھی پیش کی گئی تاکہ شہر کے اہم داخلی و مرکزی راستے کی مجموعی خوبصورتی اور ظاہری حالت کو بہتر بنایا جاسکے۔کمشنر کراچی نے متعلقہ اداروں کو ہدایت کی کہ نشاندہی کیے گئے مقامات پر بہتری کے کام ایک ہفتے کے اندر مکمل کیے جائیں اور اس حوالے سے پیش رفت سے آگاہ کیا جائے۔ انہوں نے ہدایت کی کہ شارع فیصل اور ریڈ زون کی تزئین و آرائش کے ساتھ بنیادی شہری سہولتوں کی فراہمی کو بھی یقینی بنایا جائے۔