خواتین کو معاشی اور سماجی طور پر بااختیار بنائے بغیر ترقی ممکن نہیں،ڈاکٹرندیم جاوید

جمعرات 3 ستمبر 2026 21:56

اسلام آباد (اُردو پوائنٹ اخبارتازہ ترین - اے پی پی۔ 03 ستمبر2026ء) پاکستان انسٹی ٹیوٹ آف ڈویلپمنٹ اکنامکس کے کے وائس چانسلر ڈاکٹر ندیم جاویدنے کہاہے کہ خواتین کو معاشی اور سماجی طور پر بااختیار بنائے بغیرایسی ترقی کا حصول ممکن نہیں جو معاشرے کے تمام طبقات کو یکساں طور پر فائدہ پہنچا سکے۔۔انہوں نے یہ بات جمعرات کویہاں آغا خان رورل سپورٹ پروگرام کے وفد سے ملاقات میں کہی۔

وفد میں گلگت بلتستان کے مختلف علاقوں اور کمیونٹیز کے نمائندے شامل تھے۔ وفد نے پائیڈ کے اساتذہ، محققین اور اسٹاف ماہرینِ اقتصادیات کے ساتھ کھلے مکالمے میں حصہ لیا، جس کے دوران انہیں گلگت بلتستان کے مختلف علاقوں میں مقامی کمیونیٹیز کو درپیش معاشی اور سماجی چیلنجز کو بہتر طور پر سمجھنے اور ان پر غور کرنے کا موقع ملا۔

(جاری ہے)

وائس چانسلر نے شرکا کو ان کی کمیونٹیز میں حقیقی تبدیلی لانے والے افراد قرار دیتے ہوئے ان کی کاوشوں کو سراہا۔

انہوں نے کہا کہ شرکا کے عملی تجربات اور زمینی حقائق پر مبنی نقط نظر نے پالیسی مباحثے میں قیمتی معلومات اور قابلِ قدر بصیرت فراہم کی ہے۔مذاکرے میں خواتین کی معاشی شمولیت، نوجوانوں کے لیے مواقع، مقامی ترقی کو درپیش چیلنجز اور پاکستان کی معیشت کے وسیع تر ڈھانچے سے متعلق مختلف امور زیر بحث آئے۔ شرکا نے وفاقی بجٹ کی تیاری کے عمل، این ایف سی فریم ورک اور اس کے مستقبل ، تیزی سے بڑھتی ہوئی آبادی ، وسائل کی تقسیم اور مستقبل کی منصوبہ بندی پر اثرات کا بھی جائزہ لیا۔

ڈاکٹر ندیم جاوید نے اڑان پاکستان کے فائیوایز فریم ورک پربھی روشنی ڈالی اور جامع و پائیدار ترقی کے حصول کے لیے خواتین کو بااختیار بنانے کو مرکزی اہمیت کا حامل قرار دیا۔انہوں نے کہا کہ خواتین کو معاشی اور سماجی طور پر بااختیار بنائے بغیر ایسی ترقی کا حصول ممکن نہیں جو معاشرے کے تمام طبقات کو یکساں طور پر فائدہ پہنچا سکے۔