کے ایم سی ہیڈ آفس میں آتشزدگی، آگ اچانک لگی یا لگائی گئی، تحقیقات سے اصل وجہ سامنے آئے گی، مرتضیٰ وہاب

منگل 8 ستمبر 2026 17:20

کراچی(اُردو پوائنٹ اخبارتازہ ترین - این این آئی۔ 08 ستمبر2026ء) میئر کراچی بیرسٹر مرتضیٰ وہاب نے کے ایم سی ہیڈ آفس میں اپنے دفتر میں آتشزدگی کے واقعے پر کہا ہے کہ آگ اچانک لگتی ہے یا لگائی جاتی ہے، اس کی اصل وجہ تحقیقات مکمل ہونے کے بعد ہی سامنے آئے گی۔آتشزدگی کے بعد میڈیا سے گفتگو کرتے ہوئے مرتضیٰ وہاب نے کہا کہ واقعے کی تحقیقات کا ٹاسک چیف فائر آفیسر کو دے دیا گیا ہے، تحقیقات کے بعد ہی معلوم ہوگا کہ آگ لگنے کی اصل وجہ کیا تھی۔

میئر کراچی نے بتایا کہ آتشزدگی کے نتیجے میں ان کا دفتر جل گیا ہے، تاہم ان کے پاس کوئی فائل دستخط شدہ حالت میں موجود نہیں ہوتی۔ ان کے مطابق وہ فائلوں پر دستخط کرنے کے بعد انہیں متعلقہ افسران کے دفاتر بھجوا دیتے ہیں۔مرتضیٰ وہاب نے کہا کہ وہ ہمیشہ الزام تراشی سے گریز کرتے ہیں، اس لیے اب یہ الزام نہیں لگایا جانا چاہیے کہ آتشزدگی کے نتیجے میں کوئی ریکارڈ جل گیا ہے۔

(جاری ہے)

انہوں نے کہا کہ دفتر جلنے کے بعد کسی کو یہ نہیں سوچنا چاہیے کہ وہ کام نہیں کریں گے، وہ شہر میں نکل کر عوامی مسائل کا جائزہ لیتے رہیں گے اور عارضی دفتر میں بیٹھ کر معمول کے سرکاری امور انجام دیں گے۔واضح رہے کہ کے ایم سی ہیڈ آفس میں گزشتہ روز آتشزدگی کے نتیجے میں میئر کراچی کے دفتر کو بھی شدید نقصان پہنچا تھا، فائر بریگیڈ نے کارروائی کرتے ہوئے آگ پر قابو پالیا تھا، جبکہ واقعے میں کسی جانی نقصان کی اطلاع نہیں ملی۔