اپنی آخری رسومات بھارت میں چاہتی ہوں ،اپنی راکھ آسٹریا میں بیٹے کیساتھ دفن کیے جانے کی خواہش ہے، سیلینا جیٹلی

میں اپنے بیٹے کی جدائی پر دل شکستہ ہوں، اپنے دیگر بچوں کے لیے مضبوط رہنے اور زندگی جاری رکھنے کی کوشش کر رہی ہوں، گفتگو

ہفتہ 12 ستمبر 2026 13:10

اپنی آخری رسومات بھارت میں چاہتی ہوں ،اپنی راکھ آسٹریا میں بیٹے کیساتھ ..

نئی دہلی (اُردو پوائنٹ اخبارتازہ ترین - این این آئی۔ 12 ستمبر2026ء) بھارتی اداکارہ سیلینا جیٹلی نے اپنے مرحوم بیٹے شمشیر کی سالگرہ پر جذباتی پیغام شیئر کیا ہے اور کہاہے کہ اپنی آخری رسومات بھارت میں چاہتی ہوں ، اپنی راکھ آسٹریا میں بیٹے کیساتھ دفن کیے جانے کی خواہش ہے۔تفصیلات کے مطابق سیلینا جیٹلی نے انسٹاگرام پر ایک ویڈیو پوسٹ شیئر کرتے ہوئے کہا ہے کہ میں اپنی زندگی کے قدرتی اختتام کے بعد بھارت میں اپنی آخری رسومات چاہتی ہوں جبکہ اپنی راکھ آسٹریا میں بیٹے شمشیر کے ساتھ دفن کیے جانے کی خواہش رکھتی ہوں۔

سیلینا جیٹلی نے بتایا کہ میں نے رواں سال آسٹریا کے دورے کے دوران ایک ویڈیو ریکارڈ کی تھی کیونکہ مجھے معلوم نہیں تھا کہ میں دوبارہ وہاں کب جا سکوں گی۔

(جاری ہے)

انہوں نے کہا کہ ایک ماں کی خواہش ہوتی ہے کہ وہ بچے کے قریب رہے جبکہ میں زیادہ دیر تک اپنے بچے کو اپنی بانہوں میں نہیں رکھ سکی۔اداکارہ نے اپنے پیغام میں کہا کہ میں اپنے بیٹے کی جدائی پر دل شکستہ ہوں، اپنے دیگر بچوں کے لیے مضبوط رہنے اور زندگی جاری رکھنے کی کوشش کر رہی ہوں، شمشیر نے دنیا میں آنے کے کچھ ہی عرصے بعد مجھے چھوڑ دیا تھا لیکن میرا بیٹا کبھی میرے دل سے دور نہیں ہوا۔

اداکارہ نے کہا کہ مجھے آج بھی اپنے بیٹے آرتھو کی آنکھوں اور باتوں میں شمشیر کی کمی محسوس ہوتی ہے اور مجھے یقین ہے کہ شمشیر اپنے بھائی اور خود کی نگہبانی کر رہا ہے۔سیلینا جیٹلی نے کہا کہ میں نے اپنے خاندان کے ساتھ اپنا مستقبل بہتر بنانے کے لیے اپنا ملک، والدین، کام اور مانوس ماحول چھوڑا اور آسٹریا آئی لیکن اب بعض اوقات مجھے عدالت کے سامنے ان جذبات کو الفاظ اور دستاویزات کے ذریعے ثابت کرنا پڑتا ہے جو ایک ماں بننے کے بعد میری زندگی کا حصہ رہے ہیں۔

واضح رہے کہ اداکارہ سیلینا جیٹلی کی شادی آسٹریا کی کاروباری شخصیت اور ہوٹل مالک پیٹر ہاگ سے ہوئی تھی، جوڑے کے ہاں مارچ 2012 اور 2017 میں جڑواں بیٹے پیدا ہوئے تھے تاہم ان میں سے ایک، شمشیر، پیدائشی دل کے عارضے کے باعث پیدائش کے کچھ ہی عرصے بعد انتقال کر گیا تھا۔