ایروبک ایکسرسائز شوگر،جوڑوں،فالج و دیگر امراض کے لئے مفید ہے،پرنسپل پوسٹ گریجویٹ میڈیکل انسٹی ٹیوٹ

لاہور (اُردو پوائنٹ اخبارتازہ ترین - اے پی پی۔ 21 جولائی2025ء) پرنسپل پوسٹ گریجویٹ میڈیکل انسٹی ٹیوٹ و لاہور جنرل ہسپتال پروفیسر ڈاکٹر فاروق افضل نے کہا ہے کہ لاہور جنرل ہسپتال کے فزیو تھراپی ڈیپارٹمنٹ نےپہلی بار ذیابیطس کے مریضوں،فالج، جنرل سرجری،آرتھوپیڈک سرجری اور میڈیسن کے مریضوں کے لیے ایروبک ایکسرسائز متعارف کرادی ہے۔ یہ بات انہوں نے فزیوتھراپی ڈیپارٹمنٹ کی اپ گریڈیشن پر منعقدہ تقریب سے گفتگو کرتے ہوئے کہی ،جس کی معاونت مخیر حضرات نے کی ۔

پرنسپل پروفیسر فاروق افضل نے معاونت فراہم کرنے مخیر حضرات کا شکریہ ادا کیا ۔ انہوں نے کہا کہ ہفتے میں دو دن عوام کی آگاہی کے لئے ایروبک کلاسز ہوں گی تاکہ شہری ان پر عمل کر کے اپنے گھر میں ہی ایکسر سائز کر کے خوشگوار زندگی گزار سکیں۔

(جاری ہے)

اس موقع پر لاہور جنرل ہسپتال کے میڈیکل سپرنٹنڈنٹ پروفیسر ڈاکٹر فریاد حسین،ہیڈآف فزیوتھراپی ڈیپارٹمنٹ ڈاکٹر حافظ سید اعجاز احمدبرق،ڈاکٹر علینہ جاوید، ڈاکٹر عدنان مسعود، سید مظہر حسین سمیت میڈیکل سٹوڈنٹس کثیر تعداد میں موجود تھے۔

میڈیکل سپرنٹنڈنٹ پروفیسر ڈاکٹر فریاد حسین اور فزیوتھراپی ڈیپارٹمنٹ کے سربراہ ڈاکٹر حافظ سید اعجاز احمد برق نے کہا کہ ہفتے میں دو دن مفت ایروبک کلاسز منعقد کی جائیں گی تاکہ مریض اور عام شہری یہ مشقیں سیکھ کر اپنے گھروں پر بھی سر انجام دے سکیں جبکہ یہ کلاسز نہ صرف علاج بلکہ بیماریوں سے بچائو کے لئے بھی موثر ثابت ہوں گی۔پرنسپل پی جی ایم آئی پروفیسر ڈاکٹر فاروق افضل نے تقریب کے شرکا اور میڈیا سے گفتگو میں کہا کہ احتیاطی تدابیر، روزانہ ورزش، واک، کھانے پینے میں اعتدال اور حفظان صحت کے اصولوں کو اپنا کر انسان خود کو بہت حد تک بیماریوں سے محفوظ رکھ سکتا ہے نیز ٹریفک قوانین پر عملدرآمد اور ذمہ دارانہ ڈرائیونگ اور احتیاط سے ٹریفک حادثات سے بھی محفوظ رہا جا سکتا ہے کیونکہ حادثات سے سینکڑوں قیمتی جانیں ضائع ہو جاتی ہیں۔

پرنسپل پروفیسر فاروق افضل نے عملے پر زور دیا کہ وہ اپنی تمام توانائیاں مریضوں کی ویلفیئر اور مجموعی بہتری کے لئے صرف کریں۔انہوں نے طبی عملہ پر زور دیتے ہوئے کہا کہ وہ جانفشانی اور تندہی کے ساتھ اپنے فرائض کی بجاآوری کو یقینی بنائیں اور کسی قسم کا سمجھوتہ نہ کریں جبکہ مریضوں کے ساتھ حسن اخلاق سے پیش آئیں۔اس موقع پر فزیوتھراپی ڈیپارٹمنٹ کے سربراہ ڈاکٹر حافظ سید اعجاز احمد نے فراہم کی جانے والی سہولیات سے متعلق پرنسپل پروفیسر فاروق افضل کو بریفنگ دی۔