پاک سعودی دفاعی معاہدے سے پوری امت مسلمہ کے مابین اتحاد کی راہ ہموار ہو گی،افتخار علی ملک

اتوار 21 ستمبر 2025 12:20

لاہور (اُردو پوائنٹ اخبارتازہ ترین - اے پی پی۔ 21 ستمبر2025ء) سارک چیمبر آف کامرس اینڈ انڈسٹری کے سابق صدر افتخار علی ملک نے کہا ہے کہ پاک سعودی سٹریٹجک، تاریخی و دفاعی معاہدے سے پوری امت مسلمہ کے مابین اتحاد کی راہ ہموار ہو گی تاکہ ان کے خلاف کسی بھی بیرونی جارحیت کو ناکام بنایا جا سکے۔ اتوار کو یہاں ایک بیان میں انہوں نے کہا کہ اس معاہدہ کا بنیادی اصول ہے کہ کسی بھی ملک کے خلاف جارحیت کو دونوں کے خلاف جارحیت تصور کیا جائے گا۔

بلاشبہ یہ پاکستان کی سفارتی، سیاسی اور جغرافیائی سطح پر بڑی کامیابی ہے ۔ یہ معاہدہ محض دو طرفہ مفاہمت نہیں بلکہ عالم اسلام کے دو اہم ستونوں کے درمیان غیر متزلزل اتحاد کی علامت ہے اور یہ پوری امت مسلمہ کے لیے یکجہتی، طاقت اور لچک کے ایک نئے باب کا آغاز ہے۔

(جاری ہے)

پاک سعودیہ معاہدہ سے پوری مسلم دنیا کو بڑھتے ہوئے خطرات سے نمٹنے کے لیے اجتماعی طور پر کام کرنے کی ترغیب ملے گی۔

انہوں نے کہا کہ اس معاہدہ سے اسرائیل کو بھی ایک مضبوط پیغام جائے گا، جو کہ فلسطینیوں کے ساتھ ساتھ مسلم اور عرب دنیا کے لیے سب سے بڑا خطرہ ہے۔ یہ معاہدہ دنیا کو واضح پیغام دے گا کہ اتحاد اور باہمی تعاون مذموم عزائم کے خلاف مضبوط ترین ڈھال ہیں۔ افتخار علی ملک نے کہا کہ یہ اتحاد پاکستان کی دشمن ریاستوں کو بھی کسی مہم جوئی سے پہلے متعدد بار سوچنے کی وارننگ کا کام کرے گا۔

معاہدہ کی ٹائمنگ بہت اہمیت کی حامل ہے اور یہ حقیقت کہ قطر پر اسرائیلی حملے کے چند دن بعد ہی اس پر دستخط کیے گئے تھے، عالمی سطح پر کسی سے اوجھل نہیں۔ انہوں نے کہا کہ سعودی عرب سمیت خلیجی ممالک کے امریکا کے ساتھ گہرے تعلقات ہیں مگر اب وہ دفاع کے لیے دوسرے آپشنز تلاش کر رہے ہیں۔ انہوں نے کہا کہ پاکستان کے خلیجی ریاستوں کے ساتھ بہترین تعلقات ہیں اور پاک فوج دنیا کی بہترین فوج ہے، اس لئے وہ فطری شراکت دار اور اتحادی ہیں۔