لاہور سکندرز اور پشاور لائنز پاکستان ویل چیئر چیمپئنز لیگ 2024کےفائنل میں پہنچ گئے

فیصل آباد (اُردو پوائنٹ اخبارتازہ ترین - اے پی پی۔ 16 مئی2024ء) پاکستان ویل چیئر چیمپئنز لیگ 2024ء کے سیمی فائنل مقابلوں میں لاہور سکندرز اور پشاور لائنز نے اپنے میچز جیت کر فائنل کے لئے کوالیفائی کرلیا، پشاور کے مثل خان نے مسلسل دوسری سنچری سکور کی، ایونٹ کا فائنل جمعہ کو کھیلا جائے گا۔تفصیلات کے مطابق دفاعی چیمپئن لاہور سکندرز نے کوئٹہ سٹرائیکرز کو 9وکٹوں سے شکست دے کر فائنل کیلئے کوالیفائی کیا۔

دوسری جانب پشاور لائنزنے اسلام آباد سٹالینزکا سفر تمام کردیا۔ فیصل آباد سٹیڈیم میں کھیلے گئے پاکستان چیمپئنز لیگ کے پہلے سیمی فائنل میں دفاعی چیمپئن لاہور سکندرز کا مقابلہ کوئٹہ اسٹرائیکرز سے ہوا۔ لاہور سکندرز کے بائولرز زوار خان اور کپتان رفاقت حسین کی تباہ کن بائولنگ نے کوئٹہ کی بیٹنگ لائن 14.5اوورزمیں لپیٹ دی اور کوئٹہ کی ٹیم 117رنز پر پوری ٹیم پویلین لوٹ گئی۔

(جاری ہے)

محمد علیم 40اور محمد شاہد 30رنز بناسکے جبکہ زوارخان نے 4اور رفاقت حسین نےتین کھلاڑیوں کو پویلین کی راہ دکھائی۔ فاتح لاہور نے مطوبہ ہدف باآسانی 6.5اوورزمیں ایک وکٹ کے نقصان پر پورا کیا اور 9وکٹوں سے فتح حاصل کرکے ۔ محمد فیض 71 اور وکٹ کیپرموذن نواز 40رنز بناکر نمایاں کھلاڑی رہے۔ دوسرےسیمی فائنل میں پشاور لائنز اور اسلام آباد سٹالینز آمنے سامنے ہوئے۔

پشاور لائنز نے پانچ کھلاڑیوں کے نقصان پر 215رنز بنائے۔ اوپنر مثل خان نے ایک بار بھی شاندار سنچری بنائی اور 71گیندوں کی مدد سے 115رنز کی اننگز کھیلی۔ محمد بلال نے 41رنز بنائے جبکہ ساجد نے تین اور ایوب نے ایک وکٹ لی۔ 216رنز کے تعاقب میں اسلام آباد سٹالینزمقررہ 20اوورز میں5کھلاڑیوں کے نقصان پر 208رنز بناسکی اور پشاور لائنز نے اسلام آباد کو 7رنز سے دیکر ایونٹ سے باہر کردیا۔ نائب کپتان محمد مبین 79 اور احمد یار نے 68رنز بنائے جبکہ بلال رانی نے دو، کپتان ذالفقارسواتی، محمد سعید، گوہرآفریدی نے ایک،ایک وکٹ لی۔