غیر ملکی سفیر کو خفیہ دستاویزات دینے پر اسلام آباد پولیس کے اے ایس آئی کو 3 سال قید کی سزا کا حکم

اسلام آباد(اردو پوائنٹ اخبارتازہ ترین۔18 مئی 2024 ) اسلام آبادکی آفیشل سیکریٹ ایکٹ کے تحت قائم کی گئی خصوصی عدالت نے غیر ملکی سفیر کو خفیہ دستاویزات فراہمی پر اسلام آباد پولیس کے اے ایس آئی کو 3 سال قید کی سزا کا حکم دیدیا،غیر ملکی سفیر کو خفیہ دستاویزات فراہم کرنے کے کیس کی سماعت خصوصی عدالت کے جج طاہر عباس سپرا نے کی۔سماعت کے دوران اسلام آباد پولیس کے اسسٹنٹ سب انسپکٹر (اے ایس آئی) ظہور احمد کے خلاف غیر ملکی سفیر کو خفیہ دستاویزات فراہم کرنے کا الزام ثابت ہوگیا۔

عدالت نے قید کی سزا سنا دی ۔ سزا سنائے جانے کے بعد پولیس نے ظہور احمد کو کمرہ عدالت سے گرفتار کر لیا۔وفاقی تحقیقاتی ایجنسی (ایف آئی اے) کے انسداد دہشت گردی وِنگ نے غیر ملکی سفارتکار سے حساس معلومات کا تبادلہ کرنے والے اسلام آباد پولیس کے اسسٹنٹ سب انسپکٹر (اے ایس آئی) کو2021ءمیں گرفتار کیا تھا۔

(جاری ہے)

ملزم گولرا پولیس اسٹیشن میں بطور اے ایس آئی تعینات تھا۔

یاد رہے کہ ایف آئی اے کے انسداد دہشت گردی وِنگ نے ملزم کو خفیہ اطلاع پر گرفتار کیا گیا تھا، ایف آئی اے کواطلاع ملی تھی کہ ملزم غیر ملکی سفارتکار سے ملے گا اور معلومات اور اس سے متعلق دستاویزات فراہم کرے گا۔ایف آئی اے کاونٹر ٹیررازم سیل نے کارروائی کے دوران ملکی راز بیچنے کے الزام میں اسلام آباد پولیس کے افسر کو گرفتارکیا تھا۔ اے ایس آئی کے خلاف آفیشل سیکریٹ ایکٹ 1923 کی دفعات کے تحت مقدمہ بھی درج کیا گیاتھا۔

پولیس اہلکار پر غیرملکی سفیر سے ملاقات کی منصوبہ بندی کرکے اہم ملکی دستاویزات دینے کا الزام ہے، اے ایس آئی غیر ملکی سفیر کے ایجنٹ کے ساتھ گاڑی پر جناح ایونیو سے نامعلوم مقام پر گیا تھا جس کے بعد اے ایس آئی کو غیر ملکی سفیر کے ایجنٹ نے واپس جناح ایونیو بلیو ایریا میں اتارا، ایف آئی اے نے ملزم کو گرفتار کرکے اس سے لفافے میں 50 ہزار روپے، یو ایس بی اور اے ٹی ایم کارڈ قبضے میں لیا گیاتھا۔