ججز تقرری کیلئے سپریم کورٹ نے جوڈیشل کمیشن کا اجلاس طلب کر لیا

اسلام آباد (اردو پوائنٹ اخبارتازہ ترین۔20 مئی 2024 ) ججز تقرری کیلئے سپریم کورٹ نے جوڈیشل کمیشن کا اجلاس طلب کر لیا،سپریم کورٹ میں مزید 3 ججز کی تعیناتی کیلئے جوڈیشل کمیشن کا اجلاس 7 جون کو طلب کیا گیا ہے،جوڈیشل کمیشن 3 ججز کی تقرر کیلئے 9 ججز کے ناموں پر غور کرے گا۔ چیف جسٹس لاہور ہائی کورٹ ملک شہزاد احمد کا نام زیر غور ناموں میں شامل ہے۔چیف جسٹس سندھ ہائیکورٹ عقیل عباسی کے نام پر بھی ملک کی اعلیٰ عدالت میں تعیناتی کیلئے غور کیا جائے گا۔

ججز کی تقرری کیلئے لاہور ہائی کورٹ کے 6 ججز کے نام زیر غور آئیں گے۔سندھ ہائی کورٹ کے 3 ججز کے نام بھی سپریم کورٹ میں تعیناتی کیلئے زیر غور آئیں گے۔ خیال رہے کہ جوڈیشل کمیشن رولز میں ترامیم سے متعلق جوڈیشل کمیشن کا اجلاس رواں ماہ کے شروع میں چیف جسٹس قاضی فائز عیسیٰ کی زیر سربراہی منعقد ہوا تھاجس میں ججز کی تقرریاں موجودہ رولز کے تحت کرنے پر اتفاق کیا گیا تھا۔

(جاری ہے)

اجلاس میں وفاقی وزیر قانون اعظم نذیر تارڑ نے اجلاس موخر کرنے کی گزارش کی اور کہا تھا کہ وفاقی حکومت آئین کے آرٹیکل 175۔اے میں ترمیم پر غور کر رہی ہے، انہوں نے کہا تھا کہ مجوزہ ترمیم کے ذریعے جوڈیشل کمیشن کی ساخت تبدیل ہو سکتی ہے۔اجلاس کا ایجنڈا جوڈیشل کمیشن رولز میں مجوزہ ترامیم کا جائزہ لینا تھا اور دوران اجلاس چیئرمین جوڈیشل کمیشن قاضی فائز عیسیٰ نے اراکین سے مجوزہ تجاویز پر رائے طلب کی تھی۔

اجلاس میں اتفاق کیا گیا تھا کہ ججز کی تقرری کے معاملے پر تاخیر نہیں ہونی چاہیے جبکہ ججز کی تقرریاں موجودہ رولز کے تحت کرنے پر اتفاق کیا گیا۔اعلامیے کے مطابق جسٹس یحییٰ آفریدی نے ایجنڈے پر بحث نہ کرنے اور اجلاس ملتوی کرنے کی تجویز دی جس پر تمام اراکین نے اجلاس ملتوی کرنے پر اتفاق کیا تھا۔