سنٹرل پولیس آفس اسلام آباد میں ڈیپارٹمنٹل پروموشن کمیٹی کا اجلاس ،121 کانسٹیبلوں کو ترقی دی گئی

اسلام آباد (اُردو پوائنٹ اخبارتازہ ترین - اے پی پی۔ 19 مئی2024ء) انسپکٹر جنرل آف پولیس اسلام آباد سید علی ناصر رضوی کی خصوصی ہدایات پر سنٹرل پولیس آفس اسلام آباد میں ڈیپارٹمنٹل پروموشن کمیٹی (ڈی پی سی) کا اجلاس منعقد ہوا جس میں 121 کانسٹیبلوں کو ترقی دی گئی۔ اتوار کو اے پی پی سے گفتگو کرتے ہوئے ترجمان پولیس نے بتایا کہ اجلاس کی صدارت ایس پی ہیڈ کوارٹرز نے کی جس میں اعلیٰ پولیس افسران نے شرکت کی۔

اجلاس میں پروموشن کمیٹی نے ہیڈ کانسٹیبلز کی خالی سیٹوں کے لیے کانسٹیبلز کے سروس ریکارڈ کا جائزہ لیا۔کمیٹی نے اچھے ریکارڈ والے 121 کانسٹیبلوں کو ہیڈ کانسٹیبل سے ترقی دینے کی سفارش کی۔ منظوری کے بعد ہیڈ کانسٹیبل کے عہدوں پر 121 کانسٹیبلوں کی ترقیوں کے نوٹیفکیشن جاری کیے جائیں گے۔

(جاری ہے)

مزید یہ کہ اب تک 384 اہلکاروں کو اگلے رینک پر ترقی دی گئی ہے۔

ترقی پانے والے افسران میں اسلام آباد پولیس کے 52 سب انسپکٹرز کو انسپکٹر کے عہدے پر، 91 اسسٹنٹ سب انسپکٹرز کو سب انسپکٹر کے عہدے پر، 120 ہیڈ کانسٹیبل کو اسسٹنٹ سب انسپکٹر کے عہدے پر اور 121 کانسٹیبل کو ہیڈ کانسٹیبل کے عہدے پر تعینات کیا گیا ہے۔ مزید برآں ان ترقی پانے والے افسران کے اعزاز میں مختلف تقاریب کا انعقاد کیا گیا جس میں آئی جی اسلام آباد سید علی ناصر رضوی نے نئے ترقی پانے والے افسران کو ذاتی طور پر بیجز لگائے۔

آئی جی نے کہا کہ پروموشن ہر پولیس افسر کا بنیادی حق ہے۔ انہوں نے کہا کہ محکمانہ پروموشن کورسز پاس کرنے والے تمام افسران کو ان کی سنیارٹی کے مطابق خالی سیٹوں پر ترقی دی جائے گی۔انہوں نے مزید کہا کہ ترقیاں حاصل کرنے والے افسران کو وہ ذاتی طور پر درجہ دیں گے۔ رینکنگ تقریب میں افسران کے اہل خانہ کو بھی خصوصی طور پر مدعو کیا جائے گا۔ انہوں نے کہا کہ پولیس فورس کی فلاح و بہبود میری اولین ترجیحات میں شامل ہے۔