کامسیٹس یونیورسٹی کے مستقل ریکٹر کی تعیناتی کا عمل جلد مکمل ہو جائے گا، اعظم نذیر تارڑ

اسلام آباد (اُردو پوائنٹ اخبارتازہ ترین - این این آئی۔ 22 مئی2024ء) وفاقی وزیر قانون، انصاف و پارلیمانی امور اعظم نذیر تارڑ نے کہا ہے کہ کامسیٹس یونیورسٹی کے مستقل ریکٹر کی تعیناتی کا عمل جلد مکمل ہو جائے گا۔ بدھ کو سینٹ میں سینیٹر ڈاکٹر زرقہ سہروردی تیمور کے توجہ دلا ئونوٹس کے جواب میں وفاقی وزیر قانون، انصاف و پارلیمانی امور اعظم نذیر تارڑ نے کہا کہ کامسیٹس یونیورسٹی کی بہت اچھی رینکنگ ہے، یونیورسٹی کے ریکٹر ڈاکٹر ساجد قمر کینیڈا گئے اور وہاں سے انہوں نے اپنا استعفی بھجوا دیا جسے اس وقت صدر مملکت ڈاکٹر عارف علوی نے منظور کر لیا جس کے بعد ایک سرچ کمیٹی قائم کی گئی، ریکٹر کے لئی80 افراد کو انٹرویو کے لئے شارٹ لسٹ کیا، ان میں سے اب تین افراد کا ایک پینل بنایا گیا ہے اسی میں سے صدر مملکت کسی ایک کا انتخاب کریں گے۔

(جاری ہے)

انہوں نے کہا کہ ایکٹ میں تبدیلی کا اختیار صرف پارلیمان کے پاس ہے کوئی شخص ایکٹ میں لکھے لفظ کو تبدیل نہیں کر سکتا، رولز میں تبدیلی حکومت کی اجازت کے بعد ہی یونیورسٹی کا سینٹ کر سکتا ہے تاہم قائمقام ریکٹر نے رولز میں نہ تو کوئی تبدیل کی ہے اور نہ ہی وہ کر سکتے ہیں۔ تقرریوں کے حوالے سے رولز کی کوئی خلاف ورزی نہیں کی گئی۔ مستقل ریکٹر کے تقرری جلد عمل میں آجائے گی، اس کے لیے پینل شارٹ لسٹ کر کے صدر کو بھیجا جائے گا جس کی وہ منظوری دیں گے۔