پی آئی اے کی اسلام آباد ٹورنٹو کی پرواز میں فنی خرابی، 10 گھنٹے بعد کراچی لینڈنگ

ہفتہ 18 مئی 2024 17:47

کراچی (اُردو پوائنٹ اخبارتازہ ترین - این این آئی۔ 18 مئی2024ء) قومی ایئر لائن پی آئی اے کی اسلام آباد سے کینیڈا کیلئے روانہ ہونے والی پرواز کو فنی خرابی کے باعث روانگی کے 10 گھنٹے بعد کراچی اتار لیا گیا۔ ترجمان پی آئی اے کے مطابق پرواز پی کے 781 اسلام آباد سے ٹورنٹو روانگی کے بعد روس کی فضائی حدود میں تھی کہ فنی خرابی پیدا ہوگئی جس پر بوئنگ 777 طیارے کا رخ کراچی کی طرف موڑ دیا گیا، پرواز نے روانگی کے 10 گھنٹے بعد کراچی لینڈ کیا۔

(جاری ہے)

ترجمان پی آئی اے کے مطابق جہاز میں فنی خرابی معمولی نوعیت کی تھی مگر کپتان نے طویل پرواز جاری رکھنے اور بحر اوقیانوس پر پرواز کرنے سے واپسی کو ترجیح دی۔ جہاز کو کراچی انجینئرنگ بیس پہنچادیا گیا جہاں بہتر انتظامات اور پرزہ جات کی دستیابی کے باعث مرمت ممکن ہے۔ کراچی میں پرواز کے مسافروں کو ایئرپورٹ ہوٹل میں قیام کروایا گیا ہے، مسافروں کی دیکھ بھال کیلئے طعام اور ٹرانسپورٹ کا انتظام کیا گیا ہے۔ پرواز کی دوبارہ ٹورنٹو روانگی کا شیڈول ہفتہ کی دوپہر ایک بجے رکھا گیا تاکہ مسافر طویل پرواز کیلئے آرام کرسکیں۔