الخدمت نے شہر کی12مقامات پر ہیٹ اسٹروک ریلیف کیمپس قائم کردیئے

شہریوں کو ٹھنڈے مشروب ،پانی کی بوتلیں اور ہیٹ اسٹروک سے بچاؤ کے لیے آگاہی فراہم کی جا رہی ہے ہیٹ اسٹروک کے ممکنہ خطرہ کے پیش نظر الخدمت رضاکارتیار ہیں ،شہری گھروں سے باہر نکلیں تو احتیاط کریں ، قاضی سید صدرالدین

بدھ 22 مئی 2024 22:56

کراچی (اُردو پوائنٹ اخبارتازہ ترین - این این آئی۔ 22 مئی2024ء) کراچی میں شدید گرمی اور ہیٹ ویو کے خطرات کے پیش نظر الخدمت نے شہر کے 12مقامات پر ریلیف کیمپس قائم کر دیئے ،جہاں شہریوں کو ٹھنڈے مشروبات اورپینے کا صاف پانی فراہم کیا گیا اور ہیٹ اسٹروک سے بچاؤکیلئے آگاہی فراہم کی جارہی ہے ۔الخدمت کے رضاکار شہریوں کو ہیٹ اسٹروک سے بچاؤ کے لیے احتیاطی تدابیر سے بھی آگاہ کررہے ہیں۔

گزشتہ روز بڑی تعداد میں کیمپس پر شہریوں کو پینے کے پا نی کی بوتلیں فراہم کی گئیںاور انہیں حفاظتی تدا بیر سے آگاہ کیا گیا ۔

(جاری ہے)

ڈائریکٹر ڈیزاسٹر مینجمنٹ وکمیونٹی سروسز الخدمت کراچی قاضی سیدصدرالدین نے کہا ہے کہ 21 سے 27 مئی تک ہیٹ ویو کی پیش گوئی کی گئی تھی،جس کے پیش نظر الخدمت نے شہر کے 12 مقامات پر کیمپس قائم کر دئیے ہیں۔انہوں نے کہا کہ ہیٹ ویو سے بچاؤ کے لیے لوگوں میں آگاہی ضروری ہے ۔

دوپہر کے اوقات میں گھر وں سے نکلنے میں احتیاط برتی جائے ۔اس حوالے سے بچوں اور بزرگوں کا خیال رکھا جانا انتہائی ضروری ہے ۔ گھر سے باہر یا کام کی جگہ جاتے ہوئے پانی کی بوتل ساتھ رکھیں ۔قاضی سید صدرالدین نے کہا کہ الخدمت کے رضاکار کسی بھی ممکنہ خطرہ کے پیش نظر الرٹ ہیں اور شہریوں کو مدد فراہم کر نے کے لیے مستعد اور تیار ہیں۔