صوبائی وزیر برائے یونیورسٹیز و بورڈز محمد علی ملکانی کی سربراہی میں میٹرک و انٹر بورڈ کا اجلاس

کراچی (اُردو پوائنٹ اخبارتازہ ترین - این این آئی۔ 22 مئی2024ء) صوبائی وزیر برائے یونیورسٹیز و بورڈز محمد علی ملکانی کی سربراہی میں میٹرک و انٹر بورڈ کا اجلاس سیکریٹری یونیورسٹیز اینڈ بورڈز کے آفیس میں منعقد ہوا اجلاس میں سیکریٹری یونیورسٹیز اینڈ بورڈز عباس بلوچ, ایڈیشنل سیکریٹری ڈاکٹر افشاں رباب،ایڈیشنل سیکریٹری طارق قریشی،میٹرک و انٹر بورڈز کے چیئرمین،سیکریٹریز اور کنٹرولرز شریک ہوئے۔

اجلاس میں حالیہ میٹرک کے امتحانات پرائیوٹ سینٹرز میں منعقد کروانے،طلبا کو درپیش مشکلات اور امتحانات میں مجموعی طور بدانتظامی اور بیقاعدگیوں کی شکایات کی بابت تفصیل سے گفتگو کی گئی اور اس حوالے سے وزیر جامعات نے میٹرک بورڈ افسران سے پوچھ گچھ کی اور خاطر خواہ جواب نہ ملنے پر برہمی کا اظہار کیا۔

(جاری ہے)

وزیر جامعات و بورڈز محمد علی ملکانی نے کہا کہ پرائیوٹ سینٹرز میں امتحانات کی وجہ سے بچوں کو شدید مشکلات کا سامنا کرنا پڑاجوکہ نہیں ہونا چاہیے تھا۔

انہوں نے میٹرک بورڈ کے افسران سے پوچھا کہ چھوٹے چھوٹے پرائیویٹ سینٹرز میں ڈیکوریشن کی کرسیاں رکھی گئیں ان پر کوئی اسٹوڈنٹ کیسے پیپر لکھ سکتا ہے۔انہوں نے کہا کہ بورڈز افسران کی کارکردگی انتہائی مایوس کن رہی ہے اور اس قسم کی غفلت برداشت نہیں کی جائے گی۔انہوں نے سیکریٹری کو تمام شکایات کی انکوائری کروانے کی ہدایت کی۔اجلاس میں حالیہ امتحانات کے دوراں پرائیویٹ سینٹرز میں بدانتطامی و بے قاعدگیوں کی شکایات پر تفصیلی بات چیت کی گئی اور فیصلہ کیا گیا کہ آئندہ برس پرائیوٹ سینٹرز میں امتحانات منعقد نہیں کیے جائیں گے اور تمام امتحانات سرکاری اسکولوں و کالجوں میں کروائے جائیں گے۔

محمد علی ملکانی نے دونوں امتحانی میٹرک اور انٹر بورڈز کے بورڈ آف گورنرز (BOGs) کی تشکیل اور انکے ممبران کا اجلاس نہ بلوانے پر بھی تشویش کا اظہار کیااور سیکریٹری یونیورسٹیز اینڈ بورڈز عباس بلوچ کو بی او جی اراکین کی تفصیلات اور بورڈز کی ازسر نو تشکیل کے ڈرافٹ سمری بنانے کی بھی ہدایات دیں۔انہوں نے میٹرک بورڈ افسران سے پوچھ گچھ کی گذشتہ قائم مقام وزیر اعلیٰ سندھ کی طرف سے منظور کی گئی انکوائری رپورٹ پر اب تک عملدرآمد کیوں نہیں ہوا اس وقت کی سیکریٹری تعلیم نے اپنی انکوائری میں بورڈز کے جن افسران کو ہٹانے کی سفارش کی تھی ان تمام افسران کو ہٹاکر رپورٹ پیش کریں۔

وزیر جامعات نے سیکریٹری ہباس بلوچ کو ہدایات دیں کہ امتحانات میں غیرشفافیت کی شکایات موصول ہوئی ہیں،جن کی انکوائری کروائیں اور ذمہ داران کے خلاف کارروائی کی جائے،مجھے میڈیا کی طرف سے بورڈز کے بابت پل پل کی رپورٹ ملتی ہے،بورڈز کے جو افسران بہت سی بیقاعدگیوں میں ملوث ہیں اب وہ اپنے انجام کے لیے تیار ہوجائیں۔وزیر جامعات نے سیکریٹری عباس بلوچ کو تمام بورڈز کے اسپیشل آڈٹ کروانے کے احکامات جاری کردیے۔ اس کے علاوہ اجلاس میں انٹر بورڈ چیئرمین نسیم میمن کی طرف سے کراچی میں انٹر کے امتحانات یکم جون سے منقعد کرانے کی درخواست کی گئی جس کی وزیر جامعات نے منظوری دے دی،بورڈ کی طرف سے انٹر کے امتحانات کا تفصیلی شیڈیول بعد میں جاری کردیا جائے گا۔