سگریٹ انڈسٹری پر ٹیکس، این جی او نے پارلیمنٹرینز افسران کو پکنک پر مدعو کر لیا

کراچی(اُردو پوائنٹ اخبارتازہ ترین - این این آئی۔ 23 مئی2024ء) غیر سرکاری تنظیمیں ملکی معاشی پالیسیوں پر اثر انداز ہونے لگیں، ایک غیر سرکاری تنظیم کی جانب سے بجٹ سے قبل پارلیمنٹرینز اور افسران کے لیے پکنک کا پروگرام ترتیب دے دیا گیا۔تفصیلات کے مطابق سگریٹ انڈسٹری پر ٹیکسز کے حوالے سے ایک این جی او نے پارلیمنٹرینز اور افسران کو پکنک پر مدعو کر لیا ہے، این جی او کا سگریٹ انڈسٹری پر ٹیکسز سے متعلق دو روزہ پروگرام مری میں ہوگا۔

(جاری ہے)

اسپارک نامی این جی او نے پارلیمنٹرینز اور افسران کو مری کے لگژری ہوٹل میں ٹھہرانے کا انتظام کیا ہے، ذرائع نے بتایاکہ پارلیمنٹرینز کو ٹوبیکو ٹیکسیشن پالیسی ڈائیلاگ کے دعوت نامے ارسال کر دیے گئے ہیں۔ وزارت خزانہ، ایف بی آر افسران کو ٹوبیکو پالیسی ڈائیلاگ کے دعوت نامے ارسال کیے گئے ہیں۔ذرائع کے مطابق این جی او نے ٹوبیکو پالیسی ڈائیلاگ میں وفاقی سیکریٹری صحت کو بھی مدعو کیا ہے، پالیسی ڈائیلاگ کے شرکا کو ٹوبیکو سیکٹر سے متعلق بریفنگ دے گی، اور ٹوبیکو ٹیکسز بڑھانے پر قائل کرے گی۔پالیسی ڈائیلاگز میں پارلیمنٹرینز ،وزارت خزانہ اور ایف بی آر سے ٹوبیکو ٹیکسز بڑھانے کی اپیل بھی کی جائے گی۔