تقریب کے شرکا کی جانب سے چیزیں پھینکنے پر ماہرہ خان نے خاموشی توڑ دی

ہفتہ 18 مئی 2024 13:27

کراچی(اُردو پوائنٹ اخبارتازہ ترین - این این آئی۔ 18 مئی2024ء) اداکارہ ماہرہ خان نے پاکستان لٹریچر فیسٹیول کے دوران اپنے اوپر پھینکی جانے والی چیز پر ردعمل دیا ہے۔ماہرہ نے حال ہی میں کوئٹہ میں کراچی آرٹس کونسل آف پاکستان کی جانب سے منعقد کیے گئے پاکستان لٹریچر فیسٹیول میں شرکت کی تھی جہاں ان کی اپنے مداحوں سے ملاقات ہوئی۔اسی تقریب کی ایک ویڈیو وائرل ہوئی جس میں دیکھا گیا کہ اسٹیج پر بیٹھی ماہرہ خان کے اوپر کچھ پھینکا گیا۔

اداکارہ نے انسٹاگرام پر لکھا کہ اس تقریب میں جو کچھ ہوا وہ غیر ضروری تھا، کسی کو یہ نہیں سوچنا چاہیے کہ اسٹیج پر کچھ بھی پھینکنا ٹھیک ہے، چاہے وہ کاغذ کے ہوائی جہاز میں لپٹا ہوا پھول ہی کیوں نہ ہو۔اداکارہ نے کہا کہ ہجوم میں جب ایسے واقعات رونما ہوتے ہیں تو وہ نا صرف اپنی بلکہ دوسروں کے لیے بھی خوفزدہ ہوجاتی ہیں،جب وہ تقریب سے واپس جارہی تھیں تو کسی نے کہا تھا کہ اس واقعے کے بعد اب یہاں کوئی ایونٹ نہیں کریں گے جس پر اداکارہ ماہرہ خان نے اختلاف کیا اور کہا کہ یہ مسئلے کا حل نہیں ہے۔

(جاری ہے)

ماہرہ نے کہا کہ تقریب میں 10ہزار لوگوں میں سے ایک شخص نے ایسی حرکت کی تھی۔انہوں نے کہا کہ وہ اس واقعے کے بعد تقریب ادھوری چھوڑ کر جاسکتی تھیں لیکن تقریب میں آنے سے قبل ہجوم کی چیکنگ ہوسکتی تھی اور انہیں ایسے واقعے کا سامنا نہ کرنا پڑتا۔