سعودی عرب میں سوئمنگ سوٹ کی نمائش پربلال قریشی برہم

سوشل میڈیا صارفین نے بھی سعودی عرب میں فیشن شو کے انعقاد پر ناراضگی کا اظہار کیا

منگل 21 مئی 2024 12:03

سعودی عرب میں سوئمنگ سوٹ کی نمائش پربلال قریشی برہم

کراچی(اُردو پوائنٹ اخبارتازہ ترین - این این آئی۔ 21 مئی2024ء) پاکستانی شوبز انڈسٹری کے اداکار بلال قریشی نے سعودی عرب میں منعقد ہونے والے پہلے سوئمنگ سوٹ فیشن شو پر شدید غصے کا اظہار کیا ہے۔بلال قریشی نے اپنے آفیشل انسٹاگرام ہینڈل کی اسٹوری میں ایک پوسٹ شیئر کی جس میں بتایا گیا تھا کہ اسلامی ملک سعودی عرب کی تاریخ میں پہلی بار سوئمنگ سوٹ فیشن کا انعقاد کیا گیا جس میں ماڈلز نے نیم برہنہ سوئمنگ سوٹ پہن کر کیٹ واک کی۔

(جاری ہے)

اداکار نے اس فیشن شو پر اپنے جذبات کا اظہار کرتے ہوئے کہا کہ میری پیدائش سعودی عرب میں ہوئی اور میں وہاں ہی بڑا ہوا، میں نے ہمیشہ وہاں دینِ اسلام کے اصول اور قوانین پر سخت پیروی ہوتے دیکھی۔اٴْنہوں نے اپنی بات جاری رکھتے ہوئے کہا کہ بحیثیت مسلمان، سعودی عرب میں اب جو کچھ بھی ہورہا ہے اور جس طرح وہاں مغربی کلچر کو فروغ دیا جارہا ہے، وہ سب دیکھ کر دل ٹوٹ جاتا ہے۔بلال قریشی کی انسٹاگرام اسٹوری سوشل میڈیا پر وائرل ہوئی تو صارفین نے اداکار کی بات سے اتفاق کیا اور سعودی عرب میں فیشن شو کے انعقاد پر ناراضگی اور غصے کا اظہار کیا۔